علی گڑھ، 14 فروری ۔
سوشل ورک شعبہ نے ضلع علی گڑھ کی تحصیل گبھانہ کے سمیرا دریا پور گاؤں میں ماحولیاتی بیداری، کینسر بیداری اور ووٹر ایجوکیشن کے موضوع پر ایک ہفتہ کا دیہی سرمائی کیمپ منعقد کیا۔ اس موقع پر ایک ریلی نکالی گئی، جس میں گاؤں کے طلباء اور مقامی لوگ شامل ہوئے اور الیکشن میں ووٹ ڈالنے کے سلسلہ میں عوامی بیداری پیدا کی۔ طلباء نے انتخابات اور کینسر کے سلسلہ میں بیداری کے لئے نکڑ ناٹک بھی پیش کیا۔ اختتامی تقریب میں ایس ڈی ایم گبھانہ مسٹر ہیرالال سینی بطور مہمان خصوصی شامل ہوئے، جب کہ صدارت شعبہ نفسیات کے سابق سربراہ پروفیسر محمود ایس خان نے کی۔ مہمانان اعزازی کے طور پر پروفیسر بی بی سنگھ، مسٹر صفدر ہاشمی، اور سوشل ورک شعبہ کے سربراہ پروفیسر نسیم احمد خاں موجود تھے۔
مسٹر ہیرا لال سینی نے انتخابات اور کینسر کے سلسلہ میں بیداری پیدا کرنے میں طلباء کی کوششوں کی ستائش کی۔ پروفیسر محمود ایس خان اور پروفیسر بی بی سنگھ نے طلبہ اور اساتذہ کو کمیونٹی آؤٹ ریچ سرگرمیوں کے لئے سراہا۔ پروفیسر نسیم احمد خان نے کمیونٹی ویلفیئر میں کیمپ کی اہمیت پر روشنی ڈالی اور مندوبین کا خیرمقدم کیا۔ طلباء نے اپنی گروپ سرگرمیوں کی تلخیص پیش کی۔ اس موقع پر پوسٹر سازی مقابلے کے فاتحین میں انعامات تقسیم کیے گئے، اور ریسرچ اسکالروں اور ایم ایس ڈبلیو کے طلباء کو کیمپ میں ان کی شرکت کے لیے اسناد پیش کی گئیں۔ ڈاکٹر محمد طاہر نے تمام مندوبین، مقامی باشندوں اور گرام پنچایت پردھان کا شکریہ ادا کیا۔
ڈاکٹر محمد عارف خان نے ڈاکٹر قرۃ العین علی، ڈاکٹر شائنا سیف، ڈاکٹر عندلیب، ڈاکٹر محمد عذیر اور ڈاکٹر سمیرا خانم کے ساتھ پروگرام کی نظامت کی۔
