پرواز کے روانہ ہونے کے 24 گھنٹے بعد مسافر کا ذاتی ڈیٹا سسٹم سے ہٹا دیا جاتا ہے: وی کے سنگھ
نئی دہلی، 5 فروری (ہ س)۔ ڈیجی یاترا کے ذریعے مسافروں کی ذاتی طور پر قابل شناخت معلومات (پی آئی آئی) ڈیٹا کا کوئی مرکزی ذخیرہ نہیں ہے۔ یہ جانکاری شہری ہوا بازی کی وزارت میں وزیر مملکت جنرل (ریٹائرڈ) وی کے سنگھ نے پیر کو راجیہ سبھا میں ایک سوال کے تحریری جواب میں دی۔ انہوں نے کہا کہ پرواز کے روانہ ہونے کے 24 گھنٹے بعد مسافر کا ذاتی ڈیٹا سسٹم سے حذف کر دیا جاتا ہے۔
وی کے سنگھ نے کہا کہ ڈیجی یاترا سنٹرل ایکو سسٹم (ڈی وائی سی ای) ڈیزائن اور ڈیفالٹ کے لحاظ سے رازداری کے بنیادی اصولوں پر بنایا گیا ہے۔ مسافر کے انفرادی ڈیٹا کا کوئی مرکزی ذخیرہ نہیں ہے۔ انہوں نے کہا کہ ڈیجی یاترا سینٹرل ایکو سسٹم کا انتظام ڈیجی یاترا فاؤنڈیشن کے ذریعہ کیا جاتا ہے، جو کہ ایک غیر منافع بخش کمپنی ہے اور اس وجہ سے یہ حق اطلاعات کے قانون کے دائرے میں نہیں آتا ہے۔
انہوں نے بتایا کہ یہ ڈیجی یاترا رہنما خطوط ڈی جی سی اے (ڈائریکٹوریٹ جنرل آف سول ایوی ایشن) کے ذریعہ جاری کردہ رہنما خطوط کے تحت موبائل والیٹ پر مبنی شناخت کے لئے ہیں۔ مسافر کی ذاتی معلومات مسافر سے متعلق ڈیٹا میں محفوظ ہوتی ہیں۔ اسے ایک خفیہ شکل میں روانگی کے ہوائی اڈے کے ساتھ شیئر کیا جاتا ہے اور پرواز کے روانہ ہونے کے 24 گھنٹے بعد ڈیٹا کو سسٹم سے حذف کر دیا جاتا ہے۔
