۔ حماس کے ساتھ جنگ میں شامل ہونا حزب اللہ کی سب سے بڑی غلطی : نیتن یاہو
– اسرائیل کی جانب سے شمالی غزہ کے رہائشیوں کو علاقہ خالی کرنے کی آخری وارننگ
تل ابیب/قاہرہ، 22 اکتوبر۔
گزشتہ 15 دنوں سے جاری اسرائیل ۔ حماس جنگ کا دائرہ بڑھتا جا رہا ہے۔ لبنان کی تنظیم حزب اللہ مسلسل اسرائیلی تنصیبات کو نشانہ بنا کر حملے کر رہی ہے۔ جوابی حملے میں اسرائیلی فوج نے اتوار کو حزب اللہ کے تین ٹھکانوں کو تباہ کرنے کا دعویٰ کیا۔ دریں اثناء اسرائیلی فوج نے شمالی غزہ میں کتابچے گرائے اور وہاں کے مکینوں کو علاقہ خالی کرنے کی آخری وارننگ دی۔ اسرائیلی فوج نے لوگوں سے کہا ہے کہ اگر وہ علاقہ خالی نہیں کرتے تو انہیں بھی دہشت گرد تنظیم حماس سے منسلک سمجھا جائے گا اور وہ بھی حملے میں مارے جائیں گے۔
اسرائیلی وزیراعظم بنجمن نیتن یاہو نے حزب اللہ کو خبردار کیا ہے کہ اسرائیل ایسی انتقامی کارروائی کرے گا جو لبنان کو تباہ کر دے گا۔ حماس کے ساتھ جنگ میں شامل ہونا حزب اللہ کی سب سے بڑی غلطی ہوگی۔
میڈیا رپورٹوں کے مطابق اسرائیلی ڈیفنس فورس (آئی ڈی ایف) نے اس بار فلسطینیوں کو پرچے گرا کر شمالی غزہ سے جنوب کی طرف جانے کی حتمی وارننگ جاری کی ہے۔ اسرائیلی فوج کا یہ پیغام غزہ کی پٹی کے لوگوں کو موبائل فون آڈیو پیغام کے ذریعے بھی نشر کیا جا رہا ہے۔ آئی ڈی ایف نے کہا ہے کہ وہ عام شہریوں کو نشانہ نہیں بنا رہا ہے بلکہ غزہ کی پٹی کے شمالی علاقے کے رہائشیوں سے کہہ رہا ہے کہ وہ شہری ہلاکتوں کو کم سے کم کرنے کے لئے جنوب کی طرف بڑھیں۔
غزہ میں ممکنہ زمینی حملے کے حوالے سے اسرائیلی فوج کے ریئر ایڈمرل ڈینیل ہگاری نے کہا کہ فوج پہلے ہی حالات سے ہم آہنگ ہونے کی کوشش کر رہی ہے۔ ہم جنگ کے اگلے مرحلے میں اپنی فوج کو لاحق خطرے کو کم کرنے کے لئے اپنے حملوں کو مزید تیز کریں گے۔ اب ہم حملے تیز کرنے جا رہے ہیں۔ انہوں نے شمالی غزہ کے باشندوں سے اپیل کی کہ وہ اپنی حفاظت کے لئے جنوبی حصے کی طرف چلے جائیں۔
اسرائیلی فوج کے مطابق اتوار کو مغربی کنارے میں جنین میں واقع مسجد الانصار پر فضائی حملہ کیا گیا۔ اسرائیلی فوج کا کہنا تھا کہ حماس کے جنگجوؤں نے مسجد کو جنگی کارروائیوں کا مرکز بنا رکھا تھا۔
ادھر غزہ کے مختلف اسپتالوں کے ڈاکٹروں نے اپنے انتباہی پیغام میں کہا ہے کہ وہاں موجود 125 سے زائد نومولود بچوں کی زندگیاں خطرے میں ہیں۔ اگر ایندھن یہاں جلدی نہیں پہنچتا تو سپورٹ سسٹم کی خرابی کی وجہ سے بچے مر سکتے ہیں۔ ایک اور میڈیا رپورٹ میں دعویٰ کیا گیا ہے کہ اتوار کی صبح اسرائیل نے شام میں حلب اور دمشق کے ہوائی اڈوں پر حملہ کیا۔ جس کی وجہ سے دونوں ایئرپورٹس کے رن وے تباہ ہو گئے ہیں۔ دمشق پر فضائی حملے میں ایک شخص ہلاک ہوگیا۔
