اجیت ڈووال نے روسی ہم منصب کے ساتھ دو طرفہ تعاون کا لیا جائزہ
ماسکو، 25 اپریل ۔ ہندوستان کے قومی سلامتی کے مشیر اجیت ڈووال نے بدھ کو روس کے قومی سلامتی کے مشیر نکولائی پیٹروشیف کے ساتھ دو طرفہ تعاون پر جاری پیش رفت کا جائزہ لیا۔ باہمی دلچسپی کے اہم امور پر بھی تبادلہ خیال کیا۔ اس ماہ پیٹروشیف کے ساتھ ڈووال کی یہ دوسری ملاقات ہے۔
ماسکو میں ہندوستانی سفارت خانے نے ’’ایکس‘‘ پر ایک پوسٹ میں کہا کہ ڈووال نے سینٹ پیٹرزبرگ میں سیکورٹی معاملات کے ذمہ دار اعلیٰ عہدیداروں کی 12ویں بین الاقوامی میٹنگ کے موقع پر پیٹروشیف کے ساتھ دو طرفہ بات چیت کی۔ مراسلے میں کہا گیا کہ دونوں فریقین نے دو طرفہ تعاون میں پیش رفت کا جائزہ لیا اور باہمی دلچسپی کے اہم امور پر تبادلہ خیال کیا۔
ڈووال نے 22 مارچ کو ماسکو کے کروکس سٹی ہال پر ہونے والے وحشیانہ دہشت گردانہ حملے کی مذمت کی تھی اور اس خطرے سے نمٹنے میں دوہرے معیار سے گریز کرنے پر زور دیا تھا۔ اس ماہ کے شروع میں ڈووال نے آستانہ میں شنگھائی تعاون تنظیم (ایس سی او) کے رکن ممالک کی سلامتی کونسلوں کے سکریٹریوں کے 19ویں سالانہ اجلاس کے موقع پر پیٹروشیف سے ملاقات کی تھی۔
