غزہ میں اسپتال کے نیچے ملا سرنگ، یرغمالیوں کو یہیں رکھنے کا الزام
تل ابیب/یروشلم/واشنگٹن، 14 نومبر (ہ س)۔ اسرائیل ڈیفنس فورسز (آئی ڈی ایف) نے غزہ کی پٹی میں جنگ کے 39ویں دن آج (منگل) کی صبح ایک بڑا انکشاف کیا۔ آئی ڈی ایف نے کہا کہ غزہ میں رنتیسی اسپتال کے نیچے حماس کی سرنگ میں ایک کمرہ ملا ہے۔ غالباً حماس نے اسرائیل سے یرغمال بنائے گئے شہریوں کو اس میں رکھا تھا۔ اس کمرے میں ایک کیلنڈر ملا جس میں 7 اکتوبر کے حملے کے بعد کے دنوں کو ’’آپریشن الاقصیٰ فلڈ‘‘ کے عنوان سے نشان زد کیا گیا تھا۔ یہ اطلاع میڈیا رپورٹس میں دی گئی ہے۔
حماس نے غزہ پر کنٹرول کھو دیا: آئی ڈی ایف کے حوالے سے میڈیا رپورٹس میں کہا گیا ہے کہ حماس کی یہ سرنگ رنتیسی اسپتال اور ایک اسکول میں کھلتی ہے۔ ادھر اسرائیل کے وزیر دفاع یوو گیلنٹ کا کہنا ہے کہ حماس غزہ پر کنٹرول کھو چکا ہے۔ جنگجو جنوب کی طرف بھاگ رہے ہیں۔ وہ شہری اہداف کو لوٹ رہے ہیں۔
بائیڈن نے کہا – اسپتالوں کو تحفظ دیا جانا چاہئے: موجودہ منظر نامے پر امریکی صدر جو بائیڈن نے کہا کہ غزہ کے اسپتالوں کو تحفظ فراہم کرنے کی ضرورت ہے۔ اسرائیلی فورسز اسپتالوں کے بہت قریب پہنچ چکی ہیں۔ اسرائیل حماس کے کمانڈ کمپلیکس پر قبضہ کرنے کے لیے جدوجہد کر رہا ہے۔ یہ کمپلیکس الشفاء ہسپتال کے نیچے واقع ہے۔ بائیڈن نے کہا کہ امریکی حکام حماس اور دیگر جنگجو گروپوں کے ہاتھوں یرغمالیوں کی رہائی کے لیے کام کر رہے ہیں۔
عالمی ادارہ صحت فکر مند: عالمی ادارہ صحت نے پیر کو مریضوں کے لیے سنگین اور خطرناک صورتحال سے خبردار کیا ہے۔ تنظیم نے ایک بیان میں کہا کہ ایندھن اور پانی ختم ہونے اور مریضوں کی زندگیوں کو خطرے میں ڈالنے کے بعد الشفا اب ایک ہسپتال کے طور پر کام نہیں کر رہا ہے۔
حماس کا اعلیٰ کمانڈر جاں بحق: آئی ڈی ایف نے دعویٰ کیا ہے کہ فوجیوں نے ایک فضائی حملے میں حماس کے اعلیٰ کمانڈر کو ہلاک کر دیا ہے۔ ان کا نام احمد صیام ہے۔ انہوں نے غزہ کے ایک ہسپتال میں تقریباً 1000 افراد کو یرغمال بنا رکھا تھا۔ وہ عام شہریوں اور مریضوں کو صیام اسپتال سے باہر جانے کی اجازت نہیں دے رہا تھا۔ صیام غزہ کے رنتیسی ہسپتال میں قیام پذیر تھا۔
ہندوستھان سماچار
/شہزاد
