নলবাৰী, ১৫ অক্টোবৰ (হি স)। নলবাৰীৰ ইতিহাস প্ৰসিদ্ধ বিল্বেশ্বৰ দেৱালয়ত আজিৰে পৰা আৰম্ভ হৈছে শাৰদীয় দূৰ্গা পূজা। এইবাৰ মহানৱমীৰ দিনা উচৰ্গা সহ বলি প্ৰদান কৰা হ’ব ৬১ টাকৈ ম’হ। প্ৰায় ৪৫ লক্ষ টকা ব্যয়ৰে উদযাপন কৰাৰা প্ৰস্তুতি চলোৱা হৈছে প্ৰসিদ্ধ বিল্বেশ্বৰ দেৱালয়ত ঐতিহাসিক দুৰ্গা পূজা মহোৎসৱ৷ আজি শৈলপুত্ৰী ৰূপত দেৱীক প্ৰতিস্থা কৰি পুৱাৰে পৰা দেৱালয়ত আৰম্ভ হৈছে পূজা অৰ্চনাৰ লগতে বলি প্ৰদানৰ দৰে মাংগলিক কাৰ্য ৷
ৰজা নাগক্ষৰ দিনৰে পৰা নলবাৰী জিলাৰ ইতিহাস প্ৰসিদ্ধ শৈৱপীঠ শ্ৰীশ্ৰী বিল্বেশ্বৰ দেৱালয়ত জাকজমকতাৰে শাৰদীয় দুৰ্গা পূজা এইবেলি দহ দিনীয়া কাৰ্যসূচীৰে উদযাপন কৰাৰ বাবে ব্যাপক প্ৰস্তুতি চলোৱা হৈছে ৷ সমাগত শাৰদীয় দুৰ্গা পূজাকলৈ প্ৰস্তুতি তুংগত উঠিছে উদ্যোক্তা সকলৰ ৷ অতি ব্যয় বহুল বিল্বেশ্বৰ দেৱালয়ত উদযাপন কৰিবলৈ লোৱা দুৰ্গা পূজা পৰিচালনা কৰাৰ বাবে ইতিমধ্যে ৪৫ লাখ টকা ধাৰ্য্য কৰা হৈছে ৷ ইয়াৰ ভিতৰত এইবাৰ দুৰ্গা পূজালৈ আগমন ঘটা লাখ লাখ ভক্তক আকৰ্ষণ কৰিব চুবুৰীয়া ৰাজ্য কলকতাৰ পৰা অনা ১৬ লাখ টকাৰ ভিন্ন ৰঙী বৈদ্যুতিক লাইটে ৷ নানা ৰঙী লাইটৰ কাৰিকৰী কৌশলে পোহৰাই তুলিব বিল্বেশ্বৰ দেৱালয়ৰ চৌপাশ ৷
ইপিনে শিশুৰ পৰা বৃদ্ধলৈ এইবাৰ সকলোকে আমোদ দিব মিনা বজাৰে ৷ আনহাতে প্ৰতিবছৰৰ দৰে এইবাৰো ভ্ৰাম্যমাণ জগতত খলকনি লগোৱা ব্যয় বহুল দুখনকৈ ভ্ৰাম্যমাণ নাট্য দল ইতিহাস আৰু আবাহন থিয়েটাৰে নাট প্ৰদশৰ্ন কৰিব ৷ আনহাতে ১৫ অক্টোবৰ পৰা ২৪ অক্টোবৰলৈ দহ দিনীয়া কাৰ্যসূচীৰে বিল্বেশ্বৰ দেৱালয়ত দুৰ্গা পূজা অনুষ্ঠিত কৰা হ’ব ৷ নকলেও হ’ব যে প্ৰসিদ্ধ বিল্বেশ্বৰ দেৱালয়ত ৰাম গছৰ কলপুলিৰে দেৱীক প্ৰতিস্থা কৰি পূজা অৰ্চনা কৰা হয় ষষ্ঠীৰ পৰা ৷ ইয়াত কোনো ধৰণৰ মুৰ্তি পূজা কৰা নহয় ৷ সেয়ে এইবাৰো ব্যতিক্ৰম নহয় নৱমীৰ দিনা ম’হ বলি দিয়া মাংগলিক অনুষ্ঠানৰ ৷
প্ৰতিবছৰৰ দৰে এইবাৰো দেৱী দুৰ্গাৰ চৰণত উচৰ্গাৰ লগতে বলি দিয়া হ’ব ৬১ টাকৈ ম’হ ৷ লগতে বলি প্ৰদান কৰা হ’ব সহস্ৰাধিক পঠা ছাগলীৰ লগতে হাহঁ পাৰ চৰাই আদি ৷ দুৰ্গোৎসৱ প্ৰায় এক লক্ষ ভক্তৰ মাজত বিতৰণ কৰা হয় ভোগ ৷ লগতে পৰম্পৰাগতভাবে প্ৰতিবছৰে বিল্বেশ্বৰ দেৱালয়ত শাৰদীয় দুৰ্গা পূজাৰ মহা নৱমীৰ দিনটোত দেৱীৰ ওচৰত ম’হ বলি দিয়া মাংগলিক অনুষ্ঠানত ৰাজ্যৰ লগতে দেশ বিদেশৰ অগণন ভক্তৰ সমাগম হয় ৷
হিন্দুস্থান সমাচাৰ/প্ৰকাশ/মনোজ
