ভূপাল, ২৭ অক্টোবৰ (হি.স.)। প্ৰধানমন্ত্ৰী নৰেন্দ্ৰ মোডীয়ে আজি (শুকুৰবাৰে) মধ্যপ্ৰদেশলৈ এদিনীয়া ভ্ৰমণ কৰিব । ভগৱান শ্ৰীৰামৰ পবিত্ৰ স্থান সতনা জিলাৰ ধৰ্মীয় চহৰ চিত্ৰকূটত অৰবিন্দ ভাই মফটলালৰ ১০০ সংখ্যক জন্ম জয়ন্তী উপলক্ষে আয়োজন কৰা কাৰ্যসূচীত অংশগ্ৰহণ কৰিব। ইয়াত সদগুৰু সেৱা সংঘৰ চিকিৎসালয়ৰ ব্যৱস্থা প্ৰত্যক্ষ কৰাৰ পিছত তেওঁ নতুন শাখা উদ্বোধন কৰিব।
দৰাচলতে মানৱ কল্যাণৰ আকাংক্ষাৰে ধৰ্মীয় চহৰ চিত্ৰকূটৰ সদগুৰু চকু চিকিৎসালয় জানকীকুণ্ড সন্ত ৰণচোৰদাস মহাৰাজৰ প্ৰেৰণাৰে আৰম্ভ কৰিছিল দেশৰ বিখ্যাত উদ্যোগপতি তথা মফটলাল গোষ্ঠীৰ প্ৰতিষ্ঠাপক অৰবিন্দ ভাই মফটলালে । আজি চিত্ৰকূটত তেওঁৰ ১০০ সংখ্যক জন্ম জয়ন্তী উদযাপন কৰা হৈছে। এই জন্ম জয়ন্তী উদযাপনৰ কাৰ্যসূচীত অংশগ্ৰহণৰ অৰ্থেই প্ৰধানমন্ত্ৰী মোডীৰ আজি চিত্ৰকূট আগমন।
নিৰ্ধাৰিত সময় অনুসৰি দিল্লীৰ পৰা বায়ুসেনাৰ বিশেষ বিমানেৰে প্ৰায় ১২:৩০ বজাত খাজুৰাহো বিমানবন্দৰত উপস্থিত হ’ব প্ৰধানমন্ত্ৰী, য’ত মুখ্যমন্ত্ৰী শিৱৰাজ সিং চৌহানে তেওঁক আদৰিণি জনাব। ইয়াৰ পৰা প্ৰধানমন্ত্ৰীয়ে হেলিকপ্টাৰেৰে চিত্ৰকূটলৈ আহিব। ইয়াত তেওঁ সদগুৰু সেৱা সংঘ ট্ৰাষ্টৰ প্ৰতিষ্ঠাপক স্বৰ্গীয় ড. অৰবিন্দ ভাইৰ মফটলালৰ ১০০ বছৰীয়া জন্ম জয়ন্তীত উপলক্ষে তেওঁৰ সমাধিস্থলত শ্ৰদ্ধাঞ্জলি জ্ঞাপন কৰিব। ইয়াৰ পিছত প্ৰধানমন্ত্ৰীয়ে জনকী কুণ্ড চকু চিকিৎসালয়ৰ চৌহদত প্ৰস্তুত কৰা নতুন উইং (ছুপাৰ স্পেচিয়েলিটি হাস্পতাল) উদ্বোধন কৰিব।
চিত্ৰকুটত থকা সময়ছোৱাত প্ৰধানমন্ত্ৰী মোদীয়ে আবেলি প্ৰায় ৩:১৫ বজাত কাঞ্চ মন্দিৰত পূজা-অৰ্চনা আগবঢ়াব আৰু দৰ্শন কৰিব । ইয়াৰ পিছত তেওঁ তুলসী পীঠাধীশ্বৰ জগদগুৰু স্বামী ৰামভদ্ৰাচাৰ্য মহাৰাজক সাক্ষাৎ কৰি পানিনি অষ্টধ্যায়ীৰ ওপৰত তেওঁৰ দ্বাৰা লিখিত টীকা, ‘ৰামানন্দাচাৰ্য চৰিত’ আৰু ‘ভগৱান শ্ৰী কৃষ্ণৰ ৰাষ্ট্ৰলীলা’ৰ উন্মোচন কৰিব। জগদগুৰু ৰামভদ্ৰাচাৰ্য দিব্যাং ৰাজ্যিক বিশ্ববিদ্যালয়ৰ বিশেষভাৱে সক্ষম ছাত্ৰ-ছাত্ৰীয়ে প্ৰধানমন্ত্ৰীক আদৰণি জনাব। ইয়াৰ উপৰিও প্ৰধানমন্ত্ৰীয়ে সীয়াৰাম কুটিৰ ভ্ৰমণ কৰিব । তেওঁ ভাৰত ৰত্ন ৰাষ্ট্ৰঋষি নানাজী দেশমুখলৈ শ্ৰদ্ধাঞ্জলি জ্ঞাপন কৰিব।
উল্লেখযোগ্য যে সন্ত ৰণচোৰদাস মহাৰাজে সংকল্প লৈছিল যে ভোকাতুৰ লোকৰ বাবে খাদ্য, দুখীয়াৰ বাবে কাপোৰ আৰু চকুৰ ৰোগীৰ বাবে বিনামূলীয়া চিকিৎসা থাকিব লাগে। ইয়াৰ বাবে সদগুৰু চকু চিকিৎসালয় আৰম্ভ কৰা হৈছিল। এই চিকিৎসালয়খনৰ প্ৰথমটো চকুৰ ছানি অস্ত্ৰোপচাৰ (কেটেৰেক্ট অপাৰেচন) টৰ্চৰ পোহৰত কৰা হৈছিল। গোপাল সুৰদাস মহাৰাজৰ নিষ্ঠাবান সেৱক আৰু ভক্ত অৰবিন্দ ভাই মফটলালে ২০১১ চনৰ ৩০ অক্টোবৰ অৰ্থাৎ কাৰ্তিক মাহৰ চতুৰ্থীত শেষ নিশ্বাস ত্যাগ কৰে। ইয়াতেই তেওঁৰ সমাধিস্থলো নিৰ্মাণ কৰা হৈছিল। ছেঠ অৰবিন্দ ভাই মফটলালৰ জন্ম বাৰ্ষিকী প্ৰতি বছৰে ইংৰাজী তাৰিখৰ পৰিৱৰ্তে পঞ্জিকা তিথি অনুসৰি পালন কৰা হয়। এই দিনটো সদগুৰু সেৱা সংঘ ন্যাসৰ বাবেও অতি গুৰুত্বপূৰ্ণ হৈ পৰে কাৰণ আজিৰ দিনটোতে অৰবিন্দ ভাই মফটলালৰ গুৰু তথা সদগুৰু সেৱা সংঘ ন্যাসৰ প্ৰতিষ্ঠাপক সন্ত ৰণচোৰস মহাৰাজৰ জন্ম হৈছিল। বৰ্তমান অৰবিন্দ ভাই মাফতলালৰ নাতি বিশদ ভাই মফটলালে চিত্ৰকূটত বাবাই আৰম্ভ কৰা সেৱাৰ কাম আগুৱাই লৈ গৈ আছে আৰু প্ৰায়ে মুম্বাইৰ পৰা চিত্ৰকূটলৈ আহে।
প্ৰধানমন্ত্ৰী মোডীয়ে প্ৰয়াত অৰবিন্দ ভাই মফটলালৰ নাতি বিশদ ভাই মফটলালৰ পৰিয়ালৰ সদস্যকে ধৰি একাংশ অতি বিশেষ ব্যক্তিৰ সৈতে ভোজন কৰিব। এই আহাৰ গ্ৰহণৰ বাবে প্ৰধানমন্ত্ৰীৰ প্ৰিয় খাদ্য প্ৰস্তুত কৰাৰ প্ৰস্তুতি চলোৱা হৈছে। প্রধানমন্ত্রীগৰাকীয়ে প্রায় চাৰি ঘণ্টা চিত্ৰকুটত থাকি বিয়লি ৪:৪৫ বজাত খাজুৰাহো বিমানবন্দৰৰ পৰা দিল্লী অভিমুখে ৰাওনা হ’ব ৷
হিন্দুস্থান সমাচাৰ / মুকেশ /মনোজ/অৰবিন্দ
