ڈیم ایم جموں نے جے کے ایس ایس بی امتحانات کے انتظامات کا جائزہ لیا
جموں، 23 جنوری (ہ س)۔ جموں و کشمیر سروس سلیکشن بورڈ کے زیر اہتمام 28 جنوری کو منعقد ہونے والے اکاؤنٹس اسسٹنٹ فنانس کے عہدوں کے لئے او ایم آر پر مبنی تحریری امتحان کا جائزہ لینے کے لئے ڈسٹرکٹ مجسٹریٹ جموں سچن کمار ویشیا نے ٹیچرز بھون میں متعلقہ افسران کی ایک میٹنگ منعقد کی۔ میٹنگ میں ایڈیشنل ڈسٹرکٹ مجسٹریٹ انسویا جموال، ریجنل ٹرانسپورٹ آفیسر،چیف ایجوکیشن آفیسر جے کے پادھا، ممبر جے کے ایس ایس بی اٹل کمار اور دیگر متعلقہ افراد نے شرکت کی۔
ڈی ایم کو اے ڈی ایم نے 33793 امیدواروں کے لئے ضلع بھر میں قائم 87 امتحانی مراکز پر انتظامات کی صورتحال کے بارے میں بریفنگ دی۔ ہر مرکز کے لیے سینٹر سپرنٹنڈنٹس، مبصرین، مجسٹریٹس کو نامزد کیا گیا ہے اور ان کے کردار اور ذمہ داریوں کے حوالے سے بریفنگ دی گئی ہے۔ میٹنگ میں امتحانی عمل کے مختلف پہلوؤں پر تبادلہ خیال کیا گیا۔
ڈی ایم نے اس بات پر زور دیا کہ آزادانہ، منصفانہ اور شفاف امتحانات ضلعی انتظامیہ کی اولین ترجیح ہے اور امتحانات کے انعقاد کے ایس او پیز پر عمل کرنے میں کسی بھی قسم کی کوتاہی کے ساتھ سختی سے نمٹا جائے گا۔ انہوں نے وقت کی اہمیت پر زور دیتے ہوئے تمام افسران اور عملے پر زور دیا کہ وہ ٹائم لائن پر سختی سے عمل کریں۔
انہوں نے مرد اور خواتین دونوں امیدواروں اور ان کے سامان کی مکمل چھان بین کی ضرورت پر زور دیا تاکہ اس بات کو یقینی بنایا جا سکے کہ کوئی امیدوار مناسب جانچ کے بغیر امتحانی مرکز میں داخل نہ ہو۔ ڈی ایم نے متعلقہ افسران کو امیدواروں کو سہولت فراہم کرنے اور امتحانی عمل کو ہموار بنانے کی ہدایت دی۔ میٹنگ کے دوران آر ٹی او جموں کو ہدایت دی گئی کہ وہ مقررہ امتحانی مراکز تک نقل و حمل کے مناسب انتظامات کو یقینی بنائیں۔ اسی طرح اداروں کے سربراہان کو امتحانی مراکز میں مناسب انتظامات کو یقینی بنانے کی ہدایت کی گئی۔
ہندوستھان سماچار
/شہزاد
