راجستھان کے 199 اسمبلی حلقوں میں ووٹنگ جاری، 1863 امیدوار میدان میں
۔ ووٹروں میں جوش، ووٹر صبح 7 بجے سے پہلے ہی بوتھ پر پہنچنے لگے تھے
۔ انتخابی عہدیداروں نے پرامن ووٹنگ کے لئے تمام ضروری انتظامات کئے
جے پور، 25 نومبر (ہ س)۔ راجستھان میں 200 میں سے 199 اسمبلی سیٹوں کے لیے ہفتہ کی صبح 7 بجے ووٹنگ شروع ہو گئی۔ ریاست کے 5 کروڑ 26 لاکھ 90 ہزار 146 ووٹر 1863 امیدواروں کی قسمت کا فیصلہ کریں گے۔ ان میں 183 خواتین امیدوار ہیں۔ ووٹنگ شام 6 بجے تک جاری رہے گی۔ الیکشن کمیشن نے ضلع الیکشن افسران کے ساتھ مل کر اضلاع میں پرامن ووٹنگ کے لیے تمام ضروری انتظامات کیے ہیں۔ ابتدائی مرحلے میں ووٹنگ کی رفتار سست ہے۔ تاہم صبح 7 بجے سے پہلے ہی لوگ ووٹ ڈالنے کے لیے بوتھ پر پہنچنا شروع ہو گئے تھے۔
راجستھان کے 199 اسمبلی حلقوں کے کل 51,507 پولنگ اسٹیشنوں پر کل 5 کروڑ 26 لاکھ 90 ہزار 146 ووٹر 1863 امیدواروں کی قسمت کا فیصلہ کریں گے۔ ریاست میں 51 ہزار 980 پولنگ اسٹیشن بنائے گئے ہیں۔ ہر پولنگ اسٹیشن پر اوسطاً 1023 ووٹرز ہیں۔ ریاست میں 1592 پولنگ اسٹیشنوں کی کمان خواتین کے حوالے کی گئی ہے اور 199 پولنگ اسٹیشنوں کی باگ ڈور معذور اہلکاروں کے حوالے کی گئی ہے۔ ریاست کے 26 ہزار 393 پولنگ اسٹیشنوں پر ویب کاسٹنگ کی جائے گی۔
ریاست کی 200 میں سے 199 سیٹوں پر ووٹنگ ہو رہی ہے کیونکہ سری گنگا نگر اسمبلی سیٹ کے امیدوار گرمیت سنگھ کنر کی موت کی وجہ سے انتخابات کو ملتوی کر دیا گیا ہے۔ حکمراں کانگریس نے 198 اور بی جے پی نے 199 سیٹوں پر امیدوار کھڑے کیے ہیں، جب کہ 737 آزاد امیدوار بھی میدان میں ہیں۔
ان کے علاوہ بی ایس پی سے 185، عام آدمی پارٹی سے 86، راشٹریہ لوک تانترک پارٹی سے 78، آزاد سماج پارٹی (کانشی رام) سے 46، بھارت آدیواسی پارٹی سے 27، رائٹ ٹو ریکال پارٹی سے 26، انڈین پیپلز گرین پارٹی سے 22، ابھینو راجستھان پارٹی کے 21، جن نائک جنتا پارٹی کے 20، بہوجن مکتی پارٹی کی 18، بھارتیہ ٹرائبل پارٹی کی 17، کمیونسٹ پارٹی آف انڈیا (مارکس) کی 17، ابھینو لوک تانترک پارٹی، اے آئی ایم آئی ایم اور بھیم ٹرائبل کانگریس کے 10-10 پارٹیوںسمیت ڈھائی درجن سے زیادہ پارٹیوں کے سینکڑوں امیدوار انتخابات لڑ رہے ہیں۔
ہندوستھان سماچار
/شہزاد
