اودھ-آسام ایکسپریس کی ایک بوگی میں آگ، مسافروں نے چلتی ٹرین سے چھلانگ لگا کر جان بچائی
بریلی، 13 نومبر (ہ س)۔ بریلی میں اودھ-آسام ایکسپریس کی ایک بوگی میں اچانک آگ لگ گئی جس کے بعد فائر بریگیڈ کی ٹیم نے موقع پر پہنچ کر آگ پر قابو پایا۔ بتایا جا رہا ہے کہ ٹرین میں کچھ مسافر پٹاخہ لے کر جا رہے تھے۔ ٹرین میں بیٹھے مسافروں نے چلتی ٹرین سے چھلانگ لگا کر جان بچائی ۔
جیسے ہی اودھ آسام ایکسپریس بریلی جنکشن پہنچنے ہی والی تھی کہ ایس -2 کوچ میں اچانک آگ لگ گئی۔ آگ لگتے ہی ٹرین میں بھگدڑ مچ گئی۔ کئی مسافروں نے چلتی ٹرین سے ہی چھلانگ لگا دی۔ تاہم جب مسافروں نے ٹرین سے چھلانگ لگائی تو ٹرین کی رفتار بہت کم تھی کیونکہ ٹرین بریلی جنکشن پہنچنے ہی والی تھی۔ ٹرین سے چھلانگ لگانے کے بعد مسافروں کو معمولی چوٹیں بھی آئیں۔ تاہم کسی کو اسپتال میں داخل نہیں کرنا پڑا۔
ٹرین میں آگ لگنے کی اطلاع ملتے ہی فائر بریگیڈ کے اہلکار فائر بریگیڈ کی گاڑی کے ساتھ ریلوے اسٹیشن پہنچ گئے۔ وہاں فائر ڈیپارٹمنٹ کے ملازمین نے فوری آگ پر قابو پایا۔ موقع پر پہنچے سی ایف او چندرا موہن شرما نے بتایا کہ کنٹرول روم کو کچھ دیر پہلے اطلاع ملی تھی کہ ٹرین میں آگ لگی ہے۔ اس میں کوئی جانی نقصان نہیں ہوا ہے۔
جی آر پی کی مدد سے بوگی کو خالی کرایا گیا اور اس بات کو یقینی بنانے کے لیے معائنہ کیا گیا کہ کوئی اور پٹاخے تو نہیں لے جا رہا ہے۔ جی آر پی کی مہم کے بعد ٹرین کو اس کی منزل کی طرف روانہ کر دیا گیا۔ پٹاخے لے جانے والا شخص ایمرجنسی کھڑکی سے اپنا سامان لے کر فرار ہو گیا ہے۔ فی الحال جی آر پی اس کی تلاش کر رہی ہے۔
ہندوستھان سماچار
/شہزاد
