گورنر بیس نے وزیر اعلیٰ سے مراٹھا ریزرویشن تحریک کی صورتحال پر تبادلہ خیال کیا
ممبئی، 31 اکتوبر (ہ س)۔ مہاراشٹر میں مراٹھا ریزرویشن کے مسئلہ پر جاری احتجاج کے پیش نظر گورنر رمیش بیس نے پیر کی دیر رات وزیر اعلیٰ ایکناتھ شندے کو راج بھون بلاکر تفصیلی بات چیت کی۔ اس کے بعد وزیر اعلیٰ ایکناتھ شندے نے نائب وزیر اعلیٰ دیویندر فڑنویس سے بات چیت کی۔ وزیر اعلیٰ نے عہدیداروں سے تفصیلی بات چیت کے بعد صورتحال پر قابو پانے کی ہدایات دی ہیں۔ اگر تشدد بند نہ ہوا تو آج (منگل) کو کئی اضلاع میں کرفیو نافذ کیا جا سکتا ہے۔
تحریک کنندگان نے پیر کو دن بھر بیڑ، جالنا، چھترپتی سمبھاجی نگر، ہنگولی، ناسک وغیرہ اضلاع میں لیڈروں کے گھروں اور دفاتر میں توڑ پھوڑ اور آگزنی کی۔ صورتحال کی سنگینی کو دیکھتے ہوئے گورنر رمیش بیس نے پیر کی شام وزیر اعلیٰ کو راج بھون طلب کیا۔ اس کے بعد وزیر اعلیٰ ایکناتھ شندے دیر رات راج بھون گئے۔ دونوں کے درمیان تقریباً 40 منٹ تک بات چیت ہوئی۔
کل وزیر اعلیٰ نے کہا تھا کہ وہ مراٹھا برادری کو ریزرویشن دینے کے لیے تیار ہیں، لیکن انہیں کچھ وقت درکار ہے۔ پھر بھی مراٹھا لیڈر منوج جارانگے تحریک پر آمادہ ہیں۔ مراٹھا مظاہرین نے سمردھی ہائی وے سمیت کئی مقامات پر ٹریفک روک دی۔ جالنا کے بدناپور میں بھی ٹرین کو روکنے کی کوشش کی گئی تھی۔آج شنڈے تمام ضلع مجسٹریٹوں اور پولیس سپرنٹنڈنٹ کے ساتھ بات چیت کرنے والے ہیں۔ اس کے علاوہ آج ہونے والی کابینہ کی میٹنگ میں مراٹھا ریزرویشن کو لے کر اہم فیصلہ لیا جا سکتا ہے۔
ہندوستھان سماچار
/شہزاد
