زلزلے سے لرز اٹھا چین، صوبہ گانسو میں 100 اور کنگھئی میں 11 لوگوں کی موت
بیجنگ، 19 دسمبر (ہ س)۔ چین میں پیر کی رات 12 بجے کے قریب آئے طاقتور زلزلے میں کم از کم 111 افراد لقمہ اجل بن گئے۔ ریکٹر اسکیل پر زلزلے کی شدت 6.2 ریکارڈ کی گئی ہے۔ چائنا ارتھ کوئیک نیٹ ورک سینٹر کا کہنا ہے کہ زلزلے کے شدید جھٹکے آتے ہی لوگوں میں دہشت پھیل گئی۔
چین کے سرکاری اخبار گلوبل ٹائمز کے مطابق زلزلے سے اب تک شمال مغربی چین کے صوبے گانسو میں 100 اور کنگھئی صوبے میں 11 افراد ہلاک ہو چکے ہیں۔ ملک کی بلیو اسکائی ریسکیو ٹیم راحت اور بچاو کے کاموں میں مصروف ہے۔ اخبار کے مطابق گانسو صوبے کی جیشیشان کاونٹی میں 6.2 شدت کے زلزلے کے بعد گانسو ہیلتھ ڈپارٹمنٹ نے 33 ایمبولینسز اور دیگر پیشہ ورانہ گاڑیوں کے ساتھ ساتھ 173 طبی کارکنوں کو جائے وقوعہ پر روانہ کیا۔
صوبہ گنگھئی نے متاثرہ علاقے میں امدادی کارروائیوں کے لیے 68 ایمبولینسز اور 40 سے زائد صوبائی اور میونسپل ماہرین کو بھی روانہ کیا۔ آج (منگل) صبح 6:30 بجے تک متاثرہ علاقے میں 300 سے زائد زخمیوں کا علاج کیا گیا۔ نیشنل ہیلتھ کمیشن نے بھی فوری طور پر طبی ایمرجنسی رسپانس فورس کو روانہ کر دیا۔ صوبہ کنگھئی کے ہائیڈونگ میں زلزلے سے بڑا نقصان ہوا ہے۔ اس وقت یہاں کم از کم درجہ حرارت منفی 12 ڈگری سیلسیس سے نیچے ہے۔ شدید سردی کے درمیان راحت اور بچاو کا کام جاری ہے۔ ہیڈونگ،جیشیشان کاونٹی سے تقریباً 20کلومیٹر دور ہے۔
گلوبل ٹائمز کے مطابق اس زلزلے نے 2010 کی یاد تازہ کر دی ہے۔ 2010 میں 6.6 کی زیادہ سے زیادہ شدت کے ساتھ ایک طاقتور زلزلہ گانسو صوبے میں آیا تھا، جس میں 100 افراد ہلاک ہوئے تھے۔
ہندوستھان سماچار
/شہزاد
