واشنگٹن، 14 جنوری (ہ س)۔ امریکی صدر جو بائیڈن کے خصوصی ایلچی (آب و ہوا) جان کیری اس سال موسم بہار تک اپنے عہدے سے مستعفی ہو سکتے ہیں۔ بائیڈن سے ملاقات میں انہوں نے اس ذمہ داری سے فارغ ہونے کی خواہش کا اظہار کیا ہے۔ 80 سالہ کیری 2021 کے اوائل سے موسمیاتی تبدیلی پر صدر کے اعلیٰ سفارت کار کے طور پر خدمات انجام دے رہے ہیں۔
نیویارک ٹائمز کی رپورٹ کے مطابق بائیڈن اور کیری کی ملاقات کے وقت موجود دو اعلیٰ حکام نے اس کی تصدیق کی ہے۔ کیری نے 2021 سے اقوام متحدہ کے تین موسمیاتی سربراہی اجلاسوں میں امریکی مذاکراتی ٹیم کی قیادت کی ہے۔ انہوں نے دنیا بھر کی حکومتوں کو گرین ہاوس گیسوں کے اخراج کو جارحانہ انداز میں کم کرنے کی ترغیب دی ہے۔
رپورٹس کے مطابق ٹرمپ انتظامیہ کے دور میں امریکہ کی جانب سے پیرس ماحولیاتی معاہدے سے دستبرداری کے بعد صورتحال پیچیدہ ہوگئی۔ بائیڈن کے صدر بننے کے بعد امریکہ نے پالیسی پر مبنی فیصلے لیتے ہوئے کیری کو نئی ذمہ داریاں سونپ دیں۔کیری نے دنیا کے دو سب سے بڑے آلودگی پھیلانے والے ممالک امریکہ اور چین کے درمیان گلوبل وارمنگ پر تعاون کی وکالت کی۔
رپورٹ کے مطابق کیری نے بدھ کو بائیڈن سے وائٹ ہاؤس میں ملاقات کی اور صدر کو مستعفی ہونے کے اپنے ارادے سے آگاہ کیا۔ کیری نے ہفتے کے روز اپنے عملے کو اپنے فیصلے سے آگاہ کیا۔ توقع ہے کہ کیری اگلے ہفتے سوئٹزرلینڈ کے شہر ڈاووس میں عالمی اقتصادی فورم کے علاوہ فروری میں پیرس میں بین الاقوامی توانائی ایجنسی کے اجلاس میں بھی شرکت کریں گے۔
ہندوستھان سماچار//سلام
