نئی دہلی، 8 جولائی (ہ س)۔ دہلی پولیس کی کرائم برانچ نے مطلوب ملزم چندر شیکھر کو گرفتار کیا ہے، جو 2021 سے مفرور تھا۔ گرفتار ملزم گاؤں تیتولی ضلع روہتک کا رہنے والا ہے۔ وہ دہلی-این سی آر میں منشیات کی اسمگلنگ کرتا تھا۔ کرائم برانچ کے ڈی سی پی ہرش اندورا کے مطابق ملزم کو عدالت نے 2023 میں مفرور قرار دیا تھا۔
ڈی سی پی کے مطابق ملزم چندر شیکھر 16 سے 17 ستمبر 2021 کی درمیانی شب دہلی کے دوارکا علاقے میں گانجے کی اسمگلنگ میں ملوث تھا۔ وہ اپنے 5 سے 6 ساتھیوں کے ساتھ آندھرا پردیش سے دو گاڑیوں میں گانجہ لایا تھا۔ پولیس نے دوارکا کے قریب کارروائی کرتے ہوئے ایک اسکارپیو گاڑی سے 358 کلو گرام گانجہ اور تین ملزمان کو ضبط کرلیا۔ جبکہ چندر شیکھر اور اس کے ساتھی آئی 20 کار میں فرار ہو گئے۔ اس سلسلے میں کرائم برانچ پولیس اسٹیشن میں این ڈی پی ایس ایکٹ کے تحت مقدمہ درج کیا گیا ہے۔
ڈی سی پی کے مطابق کرائم برانچ کو چند ہفتے قبل اطلاع ملی تھی کہ ملزم روہتک کے ایک گاؤں میں چھپا ہوا ہے۔ اطلاع کی تصدیق کے بعد ایک ٹیم تشکیل دی گئی۔ تکنیکی نگرانی کے بعد ملزم کو اس کے گاؤں تیتولی سے پکڑا گیا۔
دوران تفتیش ملزم نے اپنے جرم کا اعتراف کرتے ہوئے بتایا کہ خاندانی ذمہ داریوں اور مالی مجبوریوں کی وجہ سے منشیات سمگلنگ جیسے جرائم میں ملوث ہوا۔ وہ پیشے کے اعتبار سے ٹرک ڈرائیور ہے اور مسلسل اپنے ٹھکانے تبدیل کر رہا تھا اور گرفتاری سے بچ رہا تھا۔
ہندوستھان سماچار
—————
ہندوستان سماچار / عبدالواحد
