نئی دہلی، 19 اکتوبر (ہ س)۔
مرکزی خوراک سکریٹری سنجیو چوپڑا نے جمعرات کو کہا کہ تہوار کے موسم میں ضروری اشیائے خوردونوش کی قیمتیں مستحکم رہیں گی۔ انہوں نے کہا کہ حکومت نے حال ہی میں قیمتوں کو مستحکم رکھنے کے لیے کچھ فیصلے کیے ہیں۔
یہاں منعقدہ ایک پریس کانفرنس سے خطاب کرتے ہوئے، خوراک کے سکریٹری نے یقین دلایا کہ اس تہوار کے موسم میں اشیائے ضروریہ کی قیمتیں مستحکم رہیں گی۔ انہوں نے کہا کہ ہم تہواروں کے موسم میں (کھانے پینے کی اشیاء کی قیمتوں میں) کسی اضافے کی توقع نہیں کر رہے ہیں۔ سنجیو چوپڑا میڈیا کو گھریلو سپلائی اور ضروری غذائی اشیاء جیسے گندم، چاول، چینی اور خوردنی تیل کی قیمتوں کے بارے میں بریفنگ دے رہے تھے۔
سیکرٹری خوراک نے کہا کہ ملک کے کئی حصوں میں گنے کی کرشنگ شروع ہو چکی ہے۔ انہوں نے کہا کہ چینی کا نیا اسٹاک آنے والے 2 سے 3 ہفتوں میں آنا شروع ہو جائے گا۔ چوپڑا نے کہا کہ نئے شوگر مارکیٹنگ سال کے یکم اکتوبر کو چینی کا ابتدائی اسٹاک 57 لاکھ ٹن تھا۔ یہ اس وقت ڈھائی ماہ کا ذخیرہ ہے۔ ایسے میں چینی کی مقدار میں کمی یا قیمتوں میں اضافے کا کوئی امکان نظر نہیں آتا۔
چوپڑا نے کہا کہ شوگر مارکیٹنگ سال 2023-24 (اکتوبر تا ستمبر) کے دوران چینی کی برآمد کی اجازت دینے کا فیصلہ وزارت زراعت کے گنے کی پیداوار کے تخمینے کے بعد لیا جائے گا۔ درحقیقت، حکومت نے چینی کی برآمدات پر پابندی کو اس سال 31 اکتوبر سے آگے کے احکامات تک بڑھا دیا ہے۔ یہ قدم تہوار کے موسم میں مقامی مارکیٹ میں چینی کی دستیابی کو بڑھانے کے مقصد سے اٹھایا گیا ہے۔ اس سے قبل یہ پابندیاں اس سال 31 اکتوبر تک نافذ تھیں۔
ہندوستھان سماچار
