نئی دہلی، 16 اکتوبر- نیوز کلک کے بانی پربیر پورکائستھ اور ایچ آر ہیڈ امیت چکرورتی نے اپنی گرفتاری کو سپریم کورٹ میں چیلنج کیا ہے۔ پربیر پورکائستھ کی جانب سے سینئر وکیل کپل سبل نے آج چیف جسٹس ڈی وائی چندرچوڑ کی سربراہی والی بنچ کے سامنے پیش ہوتے ہوئے اس عرضی پر جلد سماعت کا مطالبہ کیا۔ سبل نے کہا کہ 73 سالہ صحافی کو بغیر اطلاع کے گرفتار کیا گیا ہے۔ دہلی ہائی کورٹ نے بھی راحت نہیں دی ہے۔ پھر چیف جسٹس نے کہا کہ اس پر غور کریں گے۔
13 اکتوبر کو دہلی ہائی کورٹ نے پربیر پورکائستھ اور امیت چکرورتی کی گرفتاری کو چیلنج کرنے والی عرضی کو مسترد کر دیا تھا۔ ہائی کورٹ نے کہا تھا کہ درخواست بے بنیاد ہے۔ پربیر پورکائستھ اور امیت چکرورتی کو دہلی پولیس نے 3 اکتوبر کو گرفتار کیا تھا۔ دونوں کو نیویارک ٹائمز میں شائع خبر کی بنیاد پر گرفتار کیا گیا ہے۔
نیویارک ٹائمز میں خبر شائع ہوئی تھی کہ نیوز کلک کو چینی پروپیگنڈہ کے لیے رقم ملی ہے۔ نیوز کے مطابق امریکی کروڑ پتی نیویل رائے سنگھم نے چینی پروپیگنڈہ کے لیے نیوز کلک کو رقم دی۔ اس معاملے میں 3 اکتوبر کو کئی صحافیوں، یوٹیوبرز اور کارٹونسٹ کے گھروں پر چھاپے مارے گئے۔ اس کے بعد دہلی پولیس نے پربیر پورکائستھ اور امیت چکرورتی کو گرفتار کر لیا۔
