کولکاتا، 21 نومبر (ہ س)۔ انکم ٹیکس (آئی ٹی) حکام نے منگل کی صبح مغربی بنگال کے ہگلی ضلع کے تحت پولبا تھانہ علاقے میں شراب کی ایک فیکٹری پر چھاپہ مارا ہے۔ محکمہ انکم ٹیکس کے ایک اہلکار نے بتایا کہ پانچ گاڑیوں میں تقریباً 20 افسران کی ایک ٹیم چھاپہ مارنے کے لیے پہنچی ہے۔ یہاں الپائن ڈسٹلریز پرائیویٹ لمیٹڈ نامی شراب کی فیکٹری میں صبح چھاپے کے دوران مرکزی نیم فوجی دستوں کو سیکورٹی کے لیے لایا گیا تھا۔ مقامی پولیس کے ساتھ مرکزی فورسز نے یہاں سیکورٹی کو یقینی بنایا ہے۔ نہ کسی کو اندر سے باہر آنے دیا جا رہا ہے اور نہ ہی باہر سے کسی کو اندر جانے دیا جا رہا ہے۔
یہ فیکٹری پولبا تھانے کے تحت مہناد گاوں میں ہے۔ اس کے مالک کا نام دیوراج مکھرجی ہے۔ تحقیقاتی عمل کی نگرانی کرنے والے محکمہ انکم ٹیکس کے ایک سینئر افسر نے کہا ہے کہ اس فیکٹری کے زیادہ تر شیئرس دہلی کے ایک ادارے کے نام پر ہیں۔ یہاں رم کا ایک خاص برانڈ بنایا جاتا ہے۔ اس کے علاوہ شراب بنانے کے لیے استعمال ہونے والا خام مال ایتھنول بھی یہاں تیار کیا جاتا ہے۔ یہاں تقریباً 300 کارکن کام کرتے ہیں جن میں خواتین بھی شامل ہیں۔
ایک کارکن نے بتایا کہ ہماری ڈیوٹی صبح 8:00 بجے سے شام 6:00 بجے تک ہوتی ہے لیکن آج صبح جیسے ہی ہم پہنچے تو مرکزی فورسز کے اہلکاروں نے ہمیں اندر جانے سے روک دیا۔ انہوں نے کہا کہ اندر جانے پر کوئی پابندی نہیں لیکن پھر باہر نہیں آ سکیں گے۔ اس لیے ہم اندر نہیں گئے۔ آئی ٹی ذرائع نے بتایا ہے کہ دیوراج مکھرجی کے حکمراں جماعت ترنمول کانگریس سے روابط ہیں اور اس کمپنی کو بڑے پیمانے پر فنڈ ٹرانسفر کے لیے بھی استعمال کیا گیا ہے۔ معلوم آمدنی سے زائد اثاثوں کی اطلاع ملنے کے بعد یہاں چھاپہ مارا گیا۔ کئی دستاویزات ضبط کیے جا رہے ہیں اور کمپنی کے اہلکاروں سے پوچھ گچھ کی جا رہی ہے۔
ہندوستھان سماچار
