खरसाङ, 26 अक्टोबर (हि.स.)। खरसाङ चिमनी देवराली समष्टीका सभासद श्याम शेर्पाले दशैंको अवसरमा खरसाङको टीभी सेनिटोरियम र खहरेस्थित वृद्धाश्रममा खाना वितरण गरेका छन्। प्रत्येक वर्ष सभासद श्याम शेर्पाले दशैंको अवसरमा दुवै ठाउँमा गएर बिरामीहरू र वृद्ध-वृद्धाहरूलाई खाना वितरण गर्नुका साथै सहयोग गर्ने गरेका छन्।
यसपालीको दशैंको अवसरमा पनि उनले उक्त कार्यलाई निरन्तरता दिएका छन्। यसपाली सभासद श्याम शेर्पा सर्वप्रथम खरसाङको टीभी सेनिटोरियम पुगेर बिरामीहरूलाई दशैंको उपलक्ष्यमा खाना वितरण गरे। उनले यहाँका जम्मा 7 जना बिरामीलाई भेटगरी खाना वितरण गरे।
खरसाङको खहरेस्थित सहयोगी हातद्वारा सञ्चालित वृद्धाश्रममा पुगेर त्यहाँ 6 वृद्ध-वृद्धाहरूलाई भेट गरी खाना वितरण गरे। यस वृद्धा आश्रममा पनि उनी वर्षेनी आउने गरेका छन्।
सभासद श्याम शेर्पाले दशैंको उपलक्ष्यमा प्रत्येक वर्ष आफु टीभी सेनिटोरियम र खहरेको वृद्धा आश्रममा आउने गरेको र यसपाली आएको बताए। उनले घर परिवारदेखि टाडा़ रहेका बिरामीहरू र वृद्धा आश्रममा रहेका वृद्ध-वृद्धाहरूसित दशैंको खुशीयाली बाढ्न र आशीर्वाद लिन आउने गरेको पनि बताए। उनले जीटीए प्रमुख अनित थापाले आफ्नो परिवार छाडेर यसपाली गत 4 अक्टोबरको दिन टिस्टा नदीमा आएको प्राकृतिक प्रकोपमा परेका पीडितहरूसित दशैं मनाएकोमा धन्यवाद पनि दिए।
हिन्दुस्थान समाचार/हनोक
