গোলাঘাট, ২২ জুন (হি.স.): সৰুপথাৰ সম জিলাৰ অন্তৰ্গত বৰপথাৰৰ গেলাবিলত এক অঘটন সংঘটিত হৈছে। গেলাবিল গাওঁ পঞ্চায়তৰ অন্তৰ্গত লাংঠাজানত সন্ধানহীন হৈছে এজন ২৮ বছৰীয়া যুৱক। শুক্ৰবাৰে দিনৰ প্ৰায় ১২ বজাত সাঁতুৰি জান পাৰ হৈ পথাৰলৈ বুলি অহাৰ পিছতেই সন্ধানহীন হৈ আছে অমৰজ্যোতি তপ’ নামৰ ওপৰলাংঠা গাঁৱৰ যুৱকজন।
ইতিমধ্যে কালিৰে পৰা এনডিআৰএফ বাহিনীৰ দলে উদ্ধাৰ অভিযান অব্যাহত ৰাখিছে যদিও বৰ্তমানলৈকে কোনো সন্ধান পোৱা নাই যুৱকজনৰ। আনহাতে উক্ত ঘটনা সংঘটিত হোৱাৰ পিছতেই পোহৰলৈ আহিছে আন এক তথ্য। উক্ত গাঁৱৰ মধ্যত থকা লাংঠাজান পাৰ হ’বৰ বাবে ছাত্ৰ-ছাত্ৰী তথা গাওঁবাসীয়ে ব্যৱহাৰ কৰে মাত্ৰ এডাল বাঁহৰ সাঁকো। উপযুক্ত দলঙৰ সুব্যৱস্থা নথকাৰ বাবেই ইয়াৰ পূৰ্বেও উক্ত জান পাৰ হওঁতে কেইবাটাও অনুৰূপ ঘটনা সংঘটিত হৈ আহিছে বুলি জানিবলৈ দিছে স্থানীয় লোকসকলে।
হিন্দুস্থান সমাচাৰ / কিশোৰ মিশ্ৰ
