নলবাৰী, ২৬ অক্টোবৰ (হি.স.): নলবাৰী জিলাৰ সমূহ আৰ্থিকভাৱে দূৰ্ব্বল পৰিয়ালৰ বিবাহযোগ্য প্ৰাৰ্থিক সামূহিক বিবাহ অনুষ্ঠানৰ অংশীদাৰ হোৱাৰ বাবে নলবাৰী জিলা প্ৰশাসনৰ তৰফৰ পৰা আবেদনৰ আহ্বান জনাইছে । আৰ্থিক সঁকাহ প্ৰদানৰ উদ্দেশ্যে তথা সামাজিক সম্প্ৰীতি আৰু সংস্কৃতি সংৰক্ষণৰ অৰ্থে বৈদিক ৰীতি-নীতিৰে সামূহিক বিবাহৰ আয়োজন কৰা হৈছে নলবাৰীত।
এই বিশেষ কাৰ্যসূচী শ্ৰীশ্ৰী হৰিমন্দিৰ, নলবাৰীৰ প্ৰাংগনত আগন্তুক ৯২ সংখ্যাক ৰাস মহোৎৱ শেষ হোৱাৰ লগে লগে ১৮ নৱেম্বৰৰ দিনাখন অনুষ্ঠিত কৰা হ’ব। দৰিদ্ৰ সীমাৰেখাৰ তলৰ পৰিয়ালসমূ্হৰ সকলো ইচ্ছুক বিবাহোপযুক্ত যুৱক-যুৱতীক আগন্তুক ৩০ অক্টোবৰৰ ভিতৰত জিলা আয়ুক্তলৈ আবেদন পত্ৰ প্ৰেৰণ কৰিবলৈ আহ্বান জনাইছে জিলা আয়ুক্ত নিবেদন দাস পাটোৱাৰীয়ে। নলবাৰী জিলা প্ৰশাসনৰ তৰফৰ পৰা গ্ৰহণ কৰা এই পদক্ষেপে দৰিদ্ৰ তথা দুৰ্বল শ্ৰেণীৰ লোকসকলক নিশ্চিতভাৱে উপকৃত কৰিব।
হিন্দুস্থান সমাচাৰ / কিশোৰ মিশ্ৰ
