دھرم شالہ ، 12 فروری ۔
پیر کوایچ پی سی اے کے انٹرنیشنل کرکٹ اسٹیڈیم، دھرم شالہ میں دہلی اور ہماچل کے درمیان کھیلے گئے رنجی ٹرافی میچ کے آخری دن، دہلی کی ٹیم نے ایک بڑا اپ سیٹ کرتے ہوئے میزبان ہماچل کو 76 رنز سے شکست دی۔ ہماچل کو دہلی پر پہلی اننگز میں 55 رنز کی برتری حاصل ہونے کے باوجود اس میچ میں شکست کا منہ دیکھنا پڑا۔ دوسری اننگز میں دہلی کی ٹیم نے مضبوط بلے بازی کے بل بوتے پر چھ وکٹوں پر 381 رنز کا بڑا اسکور بنایا اور ہماچل کو 327 رنز کا ہدف دیا لیکن ہماچل کی ٹیم صرف 250 رنز تک محدود رہی۔ اس طرح دہلی نے یہ میچ 76 رنز سے جیت لیا۔ دہلی کے بلے باز آیوش بدونی کو میچ کی دو اننگز میں سنچری اور نصف سنچری بنانے پر میچ کا بہترین کھلاڑی منتخب کیا گیا۔
آج صبح ہماچل نے پہلی اننگز میں 311 رنز کے اسکور سے کھیلنا شروع کیا لیکن اس کے دو وکٹ صرف آٹھ رنز پر گر گئے۔ جس کی وجہ سے ہماچل کا پہلی اننگز کا اسکور 319 رنز تھا جب کہ دہلی کے 264 رنز تھے۔ اگرچہ ہماچل نے پہلی اننگز کی بنیاد پر 55 رنز کی برتری حاصل کر لی تھی لیکن پھر بھی میچ نہیں جیت سکی۔ وہیں دوسری اننگز میں بلے بازی کے لیے آئی دہلی کی ٹیم نے شاندار بلے بازی کرتے ہوئے صرف چھ وکٹوں پر 381 رنز پر اننگز ڈکلیئر کر دی اور ہماچل کو 327 رنز کا بڑا ہدف دیا۔ دہلی کے لیے آیوش بدونی نے 115 گیندوں میں 111 رنز کی شاندار اننگز کھیلی ، جب کہ یش دھول نے 81 گیندوں میں 82 رنز بنا کر دہلی کو بڑا اسکور بنانے میں اہم کردار ادا کیا۔ اس کے علاوہ اوپنر انوج راوت نے 332 گیندوں پر 54 رنز بنائے جبکہ کپتان ہمت سنگھ نے 45 اور جونٹی سدھو نے 46 رنز بنائے۔ ہماچل کی جانب سے رشی دھون اور ویبھو اروڑہ نے دوسری اننگز میں دو دو وکٹیں حاصل کیں۔
دوسری جانب 327 رنز کے بڑے ہدف کا تعاقب کرتے ہوئے ہماچل کی ٹیم صرف 250 رنز تک محدود رہی۔ ہماچل پردیش کے آرے میں دوسری اننگز میں آل راو¿نڈر رشی دھون نے ایک بار پھر سب سے زیادہ 65 رنز بنائے۔ انہوں نے پہلی اننگز میں 99 گیندوں پر 95 رنز کی شاندار اننگز بھی کھیلی۔ مکل نیگی ہماچل کے دوسرے بلے باز تھے جنہوں نے 37 رنز کی شراکت کی۔ دیگر بلے باز بھی کچھ خاص نہ کر سکے اور جلد ہی پویلین لوٹ گئے۔ دہلی کی جانب سے گیند بازی میں ہمانشو چوہان نے پانچ جبکہ پرانشو وجیارن نے تین وکٹیں حاصل کیں۔
دھرم شالہ میں کھیلے گئے اس میچ میں گیند بازوں کا بھی کافی غلبہ رہا۔ میچ میں دونوں ٹیموں کے تین تین بولرز نے پانچ پانچ وکٹیں حاصل کیں۔ پہلی اننگز میں ہماچل کے ونے گلیاتیا نے 16 اوورز میں 66 رنز دے کر دہلی کے پانچ بلے بازوں کو پویلین بھیج دیا ، جبکہ دہلی کے گیند باز سدھانت شرما نے بھی پہلی اننگز میں 27 اوورز میں 103 رنز دے کر ہماچل کے پانچ وکٹ لیے۔ اسی طرح دوسری اننگز میں دہلی کے گیند باز ہمانشو چوہان نے 23 اوورز میں 63 رنز دے کر پانچ وکٹیں حاصل کیں۔
