قومی کھو کھو چمپئن شپ: پہلے دن اتر پردیش اور مہاراشٹر کا رہا دبدبہ
نئی دہلی، 29 مارچ ۔ دارالحکومت دہلی میں جاری 56ویں قومی کھو کھو چمپئن شپ میں جمعرات کو اندرا گاندھی انڈور اسٹیڈیم اور کرنیل سنگھ اسٹیڈیم میں کئی میچ کھیلے گئے جس میں اترپردیش اور مہاراشٹر کے کھلاڑیوں نے شاندار کارکردگی کا مظاہرہ کرتے ہوئے اپنی ٹیموں کو فتح سے ہمکنار کیا۔
مردوں کے زمرے میں اترپردیش نے گجرات کو سنسنی خیز مقابلے میں 2 پوائنٹس سے شکست دی۔ آخری 10 سیکنڈ میں اترپردیش کے کھلاڑیوں نے اپنی بہترین تکنیک اور انتہائی چستی کے ساتھ گجرات کے 30 پوائنٹس کے مقابلے میں 32 پوائنٹس حاصل کر کے جیت حاصل کی۔
اس میچ میں یوپی کے سریش اور آل راونڈر شیوم پٹیل نے بہترین دفاعی کھلاڑی کے طور پر شاندار کارکردگی کا مظاہرہ کیا۔ اس کے علاوہ گجرات کے بھٹ گووند کی کارکردگی بھی قابل دید رہی۔
ایک اور لیگ میچ میں کرناٹک نے اتراکھنڈ کو 20-32 پوائنٹس سے شکست دی۔ وہیں ایک دیگر دلچسپ مقابلے میں کیرالہ کے وشاکھ نے 2 منٹ 30 سیکنڈ میں ناٹ آوٹ رہتے ہوئے ٹیم کے لیے 6 پوائنٹس بنائے اور شیون نے 2 منٹ 50 سیکنڈ کا وقت کھیلتے ہوئے 4 پوائنٹس بنائے، کیرالہ کو چندی گڑھ کے خلاف 10 پوائنٹس اور ایک اننگز سے جیت دلا دی۔
خواتین کے زمرے میں کھیلے گئے یک طرفہ مقابلے میں اشونی، سمپدا اور اپیکشا کی شاندار کارکردگی کی بدولت مہاراشٹر نے آسام کو 26 پوائنٹس سے شکست دی۔ ایک اور میچ میں مغربی بنگال نے چھتیس گڑھ کو 4 پوائنٹس سے شکست دی۔ کولہاپور اور اتراکھنڈ کے درمیان میچ میں کولہاپور نے 18 پوائنٹس سے کامیابی حاصل کی۔
راجستھان نے دفاعی کومل اور ریڈر پراچی کی شاندار کارکردگی کی بدولت تلنگانہ کو 8 پوائنٹس سے شکست دی۔ اس میچ میں تلنگانہ کی ٹیم کے ریڈرز کرشنا لامبا اور انوشکا نے اچھی کارکردگی کا مظاہرہ کیا لیکن وہ اپنی ٹیم کو فتح سے ہمکنار کرنے میں ناکام رہیں۔
دیر شام ہوئے ایک اور میچ میں آندھرا پردیش نے جھارکھنڈ کو 14 پوائنٹس سے شکست دی۔ آندھرا پردیش نے ہیم وتی کے بہترین دفاع اور پوجیتا کے شاندار حملے کی بنیاد پر 34 پوائنٹس بنائے جبکہ جھارکھنڈ کو صرف 20 پوائنٹس پر ہی قناعت کرنا پڑی۔
