میلبورن، 27 دسمبر (ہ س)۔ میلبورن کرکٹ گراونڈ میں کھیلے جا رہے باکسنگ ڈے ٹیسٹ میچ کے دوسرے دن بدھ کو آسٹریلیا کی پہلی اننگز 318 رنوں پر ختم ہوئی۔ آسٹریلیا کی جانب سے مارنس لابوشین نے شاندار نصف سنچری کھیلی اور 63 رن بنائے۔ لابوشین کے علاوہ سلامی بلے باز عثمان خواجہ نے 42، مچل مارش نے 41، ڈیوڈ وارنر نے 38 اور اسٹیو اسمتھ نے 26 رن بنائے۔
اس میچ میں پاکستان نے ٹاس جیت کر پہلے گیند بازی کا فیصلہ کیا۔ ڈیوڈ وارنر اور عثمان خواجہ نے آسٹریلیا کو اچھی شروعات دلائی اور پہلی وکٹ کے لیے 90 رن جوڑے۔ اس اسکور پر آغا سلمان نے وارنر کو آوٹ کر کے پاکستان کو پہلی کامیابی دلائی۔ وارنر نے 38 رن بنائے۔
اس کے بعد حسن علی نے 108 کے مجموعی اسکور پر عثمان خواجہ کو آوٹ کر کے آسٹریلیا کو دوسرا جھٹکا دیا۔ خواجہ نے 42 رن بنائے۔
154 کے مجموعی اسکور پر عامر جمال نے اسٹیو اسمتھ کو پویلین بھیج دیا۔ اسمتھ نے 26 رن بنائے۔ ٹریوس ہیڈ بھی کچھ خاص نہیں کر سکے اور 204 کے مجموعی اسکور پر صرف 17 رن بنانے کے بعد شاہین آفریدی کا شکار بن گئے۔
250 کے مجموعی اسکور پر مارش بھی 41 رن بنانے کے بعد میر حمزہ کا شکار بن گئے۔ اس کے بعد آسٹریلیا کی وکٹیں وقفے وقفے سے گرتی رہیں اور پوری ٹیم 318 رنوں پر ڈھیر ہو گئی۔
پاکستان کی جانب سے عامر جمال نے 3، میر حمزہ، حسن علی، شاہین شاہ آفریدی نے 2، 2 اور آغا سلمان نے ایک وکٹ حاصل کی۔
ہندوستھان سماچار/
