اے ایف سی ایشین کپ : عراق نے جاپان کو ہرایا، انڈونیشیا نے جگائی امید
دوحہ، 20 جنوری (ہ س)۔ عراق نے جمعہ کو ٹورنامنٹ کے مضبوط دعویدار جاپان کو 1-2 سے شکست دے کر اے ایف سی ایشین کپ کے آخری 16 میں اپنی جگہ محفوظ کر لی۔
ایجوکیشن سٹی اسٹیڈیم میں تالیوں کی گڑگڑاہٹ سے بھری بھیڑ کے سامنے ایمن حسین کے پہلے ہاف میں دو گولوں نے چار بار کی چیمپئن ٹیم کو دنگ کر دیا اور عراق کو دو راونڈز کے بعد چھ پوائنٹس کے ساتھ گروپ ڈی میں سرفہرست بنا دیا۔
اسناوی منگکلم کے پہلے ہاف میں پنالٹی پر گول کی مدد سے انڈونیشیا نے جمعہ کی دیر رات ویتنام کے خلاف 0-1 سے جیت درج کی۔ بدھ کو ہونے والے مقابلے سے پہلے انڈونیشیا جاپان کے ساتھ تین پوائنٹس پر برابر ہے اور اس نے ناک آوٹ مرحلے کے لیے کوالیفائی کرنے کی اپنی امیدیں برقرار رکھی ہیں۔
ایجوکیشن سٹی اسٹیڈیم میں 38,663 شائقین کے سامنے کانٹی نینٹل فٹ بال ٹورنامنٹ کے 2007 چیمپئن عراق نے میچ کی تیز اور رفتار کے ساتھ مضبوط آغاز کیا۔
میچ کے پانچویں منٹ میں ایمن حسین نے علی جاسم کے کراس کو گول میں تبدیل کر کے عراق کو 0-1 کی برتری دلا دی۔ عراقی پریمیئر لیگ میں کھیلنے والے 27 سالہ اسٹرائیکر حسین نے پہلے ہاف کے آخری لمحات میں ہیڈر کے ذریعے ایک اور گول کر کے اپنی ٹیم کو 0-2 سے آگے کر دیا۔
جاپان نے دوسرے ہاف میں کچھ تیزی دکھائی اور کپتان واٹارو اینڈو نے قریبی ہیڈر سے گول کرکے اپنی ٹیم کا کھاتہ کھولا اور اسکور 1-2 ہوگیا۔ آخر میں یہ اسکور فیصلہ کن ثابت ہوا اور عراق آخری 16 میں داخل ہو گیا۔
گروپ سی میں ایران نے جمعہ کی رات ہانگ کانگ کو 0-1 سے شکست دے کر ایک میچ باقی رہتے ہوئے راونڈ آف 16 میں جگہ بنالی۔
12 جنوری سے 10 فروری تک جاری رہنے والے ایشین کپ میں کل 24 ٹیمیں چھ گروپس میں حصہ لے رہی ہیں۔ گروپ کی فاتح اور رنر اپ چار بہترین تیسرے نمبر پر آنے والی ٹیموں کے ساتھ ناک آوٹ مرحلے میں داخل ہوں گی۔
ہندوستھان سماچار
/شہزاد
