جموں بھر میں دسہرہ کے موقع پر راون دہن کی تقریبات منعقد
جموں، 25 اکتوبر۔ جموں بھر میں دسہرہ کے موقع پر مذہبی جوش و جذبے کے ساتھ برائی پر اچھائی کی فتح اور جھوٹ اور فریب پر سچ کی علامت کے طور پر راون، کمبھ کرن اور میگناتھ کے پُتلے نذر آتش کئے گئے۔ جموں شہر میں دسہرہ کی مرکزی تقریب پریڈ گراونڈ میں سول اور پولیس انتظامیہ کے اعلیٰ افسران کے علاوہ سیاسی، سماجی اور مذہبی تنظیموں کے معززین کی موجودگی میں منعقد ہوئی۔ اس موقع پر موجود اہم شخصیات میں ممبر پارلیمنٹ جگل کشور شرما، بی جے پی کے صدر رویندر رینا، میئر جموں میونسپل کارپوریشن راجندر شرما، ڈپٹی میئر بلدیو سنگھ بلوریہ، ڈائریکٹر جنرل آف پولیس دلباغ سنگھ اور انسپکٹر جنرل آف پولیس (آئی جی پی) جموں زون آنند جین موجود تھے ۔
اس سے پہلے،بھگوان رام، سیتا، لکشمن، ہنومان اور دیگرکے کردار ادا کرنے والے، رگھوناتھ مندر اور دیوانہ مندر سے شوبھا یاترا کی شکل میں رتھوں پر چڑھ کر اس مقام پر پہنچے جہاں پتلے نصب کئے گئے تھے۔ راون دہن کا مشاہدہ کرنے کے لیے جمع ہونے والے پرجوش ہجوم نے ان کا استقبال بلند و بالا نعروں اور مذہبی نعروں کے ساتھ کیا۔ راون کا پتلا جلانے سے قبل خصوصی پوجا بھی کی گئی۔
دسہرہ کا تہوار ختم ہونے کے بعد وہاں موجود جموں پونچھ کے ممبر پارلیمنٹ جگل کشور شرمانے میڈیا کے نمائندوں سے بات کرتے ہوئے کہا کہ میں وجے دشمی کے پرمسرت موقع پر تمام ہم وطنوں کو مبارکباد پیش کرتا ہوں۔ یہ تہوار ہم سب کے لیے ایک تحریک ہے کیونکہ یہ جھوٹ اور فریب پر حق کی فتح اور برائیوں پر خوبیوں کی فتح کی علامت ہے۔ انہوں نے کہا کہ بھگوان رام نے ظلم وجبر کے دور میں جنم لیا تھا تاکہ راکشس راجہ راون اور اس کے رشتہ دار کمبھکرن اور میگھناد کی طرف سے جاری دہشت گردی کے دور کو ختم کیا جا سکے۔ شیطان طاقتور تھے اور وہ لوگوں پر مظالم کرنے کے لیے اپنی طاقت کا استعمال کر رہے تھے۔ وہ بری طاقتوں کی نمائندگی کر رہے تھے اور آخر کار بھگوان رام کے ذریعہ انہیں ختم کر دیا گیا ۔
جموں شہر سے باہر گاندھی نگر اور مضافات کے کئی دیگر علاقوں میں بھی اسی طرح کی ’راون دہن‘ کی تقریبات کی گئیں۔ جموں خطہ کے دیگر اضلاع بشمول ادھم پور، سانبہ، کٹھوعہ، ریاسی اور کشتواڑ میں بھی اسی طرح کی تقریبات کا اہتمام کیا گیا۔
