حماس-اسرائیل-جنگ: اسرائیل کی غزہ پر بمباری تیز، 704 افراد ہلاک
۔ حماس کی تجویز، اسرائیل ان کے ٹھکانوں پر حملہ نہ کرے تو یرغمالیوں کو رہا کر دیا جائے گا
یروشلم/ تل ابیب، 25 اکتوبر۔ رواں ماہ کی 7 تاریخ کو فلسطینی مزاحمتی تنظیم حماس کے اسرائیل پر حملے کے بعد غزہ کی پٹی پر جنگ کے بادل منڈلا رہے ہیں۔ اسرائیلی فوج نے غزہ پر اب تک کی سب سے شدید بمباری کی ہے۔
اسرائیل نے گزشتہ 48 گھنٹوں میں حماس کے 720 سے زائد ٹھکانوں پر مورٹار، راکٹ اور میزائل فائر کیے ہیں۔ ان حملوں میں 704 سے زائد افراد ہلاک ہو چکے ہیں۔ ان میں حماس کے جنگجو بھی شامل ہیں۔ اس جنگ کے درمیان حماس نے اسرائیل کے سامنے ایک نئی تجویز پیش کی ہے۔ اس نے کہا کہ اگر حملہ روک دیا گیا تو وہ یرغمالیوں کو رہا کر دے گا۔ یہ اطلاع میڈیا رپورٹس میں دی گئی ہے۔
فلسطینی حکام کا کہنا ہے کہ جنگ کے 19ویں روز میں اب تک ہزاروں افراد ہلاک ہو چکے ہیں۔ دریں اثنا اسرائیل کی ڈیفنس فورسز (آئی ڈی ایف) نے کہا ہے کہ انہوں نے گزشتہ 24 گھنٹوں میں 400 سے زائد ٹھکانوں پر حملے کیے ہیں۔ اس سے ایک روز قبل اس نے 320 سے زائد ٹھکانوں کو تباہ کیا تھا۔
حالیہ دنوں میں غزہ پر یہ سب سے تیز فضائی حملہ ہے۔ حماس کے زیر کنٹرول غزہ کی وزارت صحت کا کہنا ہے کہ یہ جنگ میں ایک دن میں ریکارڈ کی جانے والی سب سے زیادہ اموات ہیں۔ اسرائیل درجنوں حملے کر چکا ہے۔ گھروں کے علاوہ اس نے ایک مہاجر کیمپ کو بھی نشانہ بنایا ہے۔ ان حملوں میں کم از کم 704 افراد ہلاک ہوئے۔
اقوام متحدہ نے غزہ کی صورتحال پر تشویش کا اظہار کیا ہے۔ اقوام متحدہ کے سکریٹری جنرل نے کہا ہے کہ 7 اکتوبر کو حماس کے اسرائیل پر حملے میں 1400 افراد ہلاک ہوئے تھے۔ یہ ایک خوفناک حملہ تھا لیکن اس کے لیے غزہ کی پٹی کے شہریوں پر اجتماعی سزا دینا ناانصافی ہے۔ دریں اثنا آئی ڈی ایف نے حماس کا ایک آڈیو جاری کیا ہے۔ اس میں ایک خاندان کو یہودیوں کے قتل کا دعویٰ کرنے پر اکسایا جا رہا ہے۔ کچھ رپورٹس کے مطابق اسرائیل پر زمینی حملے میں تاخیر کے لیے سفارتی دباو بڑھ گیا ہے لیکن امریکی صدر جو بائیڈن نے واضح کیا ہے کہ اسرائیل اس کا فیصلہ خود کر سکتا ہے۔
آئی ڈی ایف نے کہا ہے کہ اسرائیلی فورسز نے جنین میں فوجیوں پر فضائی حملے کرنے والے سینکڑوں مسلح جنگجووں کو ہلاک کر دیا ہے۔ رپورٹس میں دعویٰ کیا گیا ہے کہ حماس اسرائیل کے حملوں سے خوفزدہ ہے۔ حماس کے ممتاز رہنما خالد مشعل نے منگل کو کہا کہ اگر اسرائیل غزہ کی پٹی میں جنگجو گروہ سے منسلک ٹھکانوں پر حملے بند کر دیتا ہے تو حماس 7 اکتوبر کو یرغمال بنائے گئے تمام شہریوں کو رہا کر دے گا۔
