ہردا پٹاخہ حادثے پر ممتا نے اظہارافسوس کیا
کولکاتا، 7 فروری (ہ س)۔ مغربی بنگال کی وزیر اعلیٰ ممتا بنرجی نے مدھیہ پردیش کے ہردا میں پٹاخہ فیکٹری میں دھماکے سے کئی لوگوں کی موت اور سینکڑوں کے زخمی ہونے کے واقعہ پر دکھ کا اظہار کیا ہے۔ انہوں نے منگل کی دیر رات ٹوئٹ کرکے دھماکے کے واقعے پر اپنے غصے کا اظہار بھی کیا۔ ممتا بنرجی نے لکھا کہ مدھیہ پردیش کے ہردا میں پٹاخہ فیکٹری میں ہونے والے افسوسناک دھماکے کے بارے میں جان کر دکھ ہوا۔ کئی لوگ اپنی جانوں سے ہاتھ دھو بیٹھے اور بہت سے لوگ زخمی ہوگئے۔ مرنے والوں کے اہل خانہ سے تعزیت کا اظہار کرتی ہوں۔‘‘
قابل ذکر ہے کہ مدھیہ پردیش میں پٹاخہ بنانے والی اس فیکٹری میں دھماکے سے 11 لوگوں کی موت ہو گئی ہے جبکہ 174 لوگوں کے زخمی ہونے کی خبر ہے۔ جن میں سے 34 افراد کی حالت تشویشناک ہے۔ پٹاخہ فیکٹری کے مالک راجیش اگروال سمیت تین لوگوں کو اس معاملے میں گرفتار کیا گیا ہے۔ فائر بریگیڈ کی 40 سے زائد گاڑیوں کو آگ بجھانے میں گھنٹوں مشقت کرنا پڑی۔ ریاستی حکومت نے مرنے والوں کے لواحقین کو فی کس چار چار لاکھ روپے اور زخمیوں کو دو دو لاکھ روپے کی امداد کا اعلان کیا ہے۔ حال ہی میں مغربی بنگال میں پٹاخوں کی کئی فیکٹریوں میں دھماکے ہوئے ہیں جن میں کئی لوگ مارے گئے ہیں۔
