جموں ،12نومبر (ہ س)،ڈسٹرکٹ مجسٹریٹ جموں سچن کمار ویشیا بابا جیتو کے مندر پہنچے اور سالانہ جھیری میلے کے ہموار انعقاد کے انتظامات کا جائزہ لیا۔ سالانہ تہوار 26 نومبر سے شروع ہوگا اور 5 دسمبر کو اختتام پذیر ہوگا۔دورے کے دوران ڈی ایم کے ہمراہ ایس ایس پی جموں ڈاکٹر ونود کمار، ایس ایس پی سیکورٹی ، ایس ڈی ایم مڑ، اے سی ڈی جموں، پریتی شرما اور دیگر متعلقہ افسران موجود تھے ۔ ڈی ایم نے مندر اور اس کے اطراف کا معائنہ کیا اور میلے کی تیاریوں کا جائزہ لیا۔اُنہوں نے افسران کو ہدایت دی کہ وہ سڑکوں کے رابطے کو یقینی بنائیں، گڑھوں کو ٹھیک کرکے سڑکوں کی بہتری، پینے کے پانی اور بیت الخلا کی سہولت، سیکوریٹی اور پارکنگ کی سہولت جیسی بنیادی سہولتوں کی فراہمی کو یقینی بنائیں۔ انہوں نے مندر کے احاطے کے اندر اور اطراف میں صفائی ستھرائی کو برقرار رکھنے پر بھی زور دیا اور افسران سے کہا کہ وہ مناسب صفائی کا عملہ اور کوڑے دان تعینات کریں۔ انہوں نے کہا کہ یہ میلہ خطے کے بھرپور ثقافتی ورثے کی نمائش اور سیاحوں کو راغب کرنے کا بہترین موقع ہے۔ افسران اس بات کو یقینی بنائیں کہ عقیدت مندوں کو اپنے دورے کے دوران ایک یادگار تجربہ حاصل ہو۔ ڈی ایم نے مقامی آرگنائزنگ کمیٹی کے ارکان سے بھی بات چیت کی اور انہیں انتظامیہ کی طرف سے مکمل تعاون کا یقین دلایا۔ جھیری میلہ ہر سال بابا جیتو کی یاد میں منایا جاتا ہے، جو ایک کسان سنت ہے جس نے انصاف اور صداقت کے لیے اپنی جان قربان کی۔ ملک کے مختلف حصوں سے ہزاروں کی تعداد میں عقیدت مند اُن کے مندر پر حاضری دینے اور دعائیں مانگتے ہیں۔ ڈی ایم نے دیوالی کے تہوار کے پیش نظر پرانی منڈی، رگھوناتھ بازار اور پرانے جموں شہر کے قلب میں واقع دیگر بازاروں کا بھی دورہ کیا۔ اس موقع پر انہوں نے دکانداروں اور مقامی لوگوں سے بات چیت کی اور انہیں مبارکباد دی۔ انہوں نے دورے کے دوران سیکورٹی انتظامات کا بھی جائزہ لیا۔
اصغر/ہندوستھان سماچار/سلام
