مرزاپور: نوجوان کو درخت سے الٹا لٹکا کر پیٹنے کی ویڈیو وائرل، تین گرفتار
مرزا پور، 07 دسمبر (ہ س)۔ ڈرمنڈ گنج تھانہ علاقہ کے مہوگڑھی گاؤں میں موبائل چوری کے الزام میں ایک نوجوان کو درخت سے الٹا لٹکا کر پیٹنے کا معاملہ سامنے آیا ہے۔ واقعے کی ویڈیو وائرل ہونے کے بعد پولیس حرکت میں آگئی اور تین ملزمان کو گرفتار کرلیا۔
ضلع کے مہوگڑھی گاؤں کی رہائشی چندرکلی نے الزام عائد کیا ہے کہ 3 دسمبر کو اس کے بیٹے جے شنکر بہیلیا کو ایک درخت سے رسی سے باندھ کر الٹا لٹکا دیا گیا۔ اس پر موبائل فون چوری کرنے کا الزام عائد کیا گیا۔ راجیش دھرکر ولد نند لال، راجیش دھرکر ولد بیراگی، چھوٹو دھرکر اور ہنس راج نے اس کی پٹائی کی اور اس کے بیٹے جے شنکر کو شدید طور پر زخمی کردیا۔ اس معاملے کی ایک ویڈیو بھی وائرل ہوئی ہے۔ پولیس نے اس کا نوٹس لیتے ہوئے متاثرہ کی ماں کی شکایت پر مقدمہ درج کر لیا۔
پولیس اسٹیشن ہیڈ ڈرمنڈ گنج اروند کمار سروج نے جمعرات کو بتایا کہ ملزمان کے خلاف مقدمہ درج کر لیا گیا ہے۔ تین ملزمان کو حراست میں لے لیا گیا ہے۔
سخت کارروائی کی جائے گی تاکہ ایسا واقعہ دوبارہ نہ ہو
ایڈیشنل سپرنٹنڈنٹ آف پولیس آپریشن آر پی سنگھ نے بتایا کہ اس معاملے میں فوری طور پر سخت دفعات کے تحت مقدمہ درج کیا گیا ہے اور تین ملزمان کو گرفتار کیا گیا ہے۔ باقی ایک ملزم دوسرے ضلع سے ہے جو گھر سے فرار ہو گیا ہے۔ اس کی گرفتاری کے لیے تین ٹیمیں تشکیل دی گئی ہیں۔ اس کی گرفتاری جلد یقینی بنائی جائے گی۔ ان کی غیر قانونی جائیدادوں کی نشاندہی کر کے ضبط کر کے مسمار کر دیا جائے گا۔ ان کے خلاف سخت کارروائی کی جا رہی ہے تاکہ مستقبل میں ایسے واقعات دوبارہ نہ ہوں۔
ہندوستھان سماچار
/شہزاد
