پٹنہ، 16 اکتوبر(ہ س)۔
بہار میں ڈینگی کے ڈنگ کا قہر کم ہونے کا نام نہیں لے رہا اور نئے معاملوں کی تعداد میں مسلسل اضافہ ہورہا ہے۔ گذشتہ ڈیڑھ مہینے سے پورا بہار ڈینگی کی زدمیں ہے اور راجدھانی پٹنہ ہاٹ اسپاٹ بن گیا ہے۔ بہار میں گزشتہ 24 گھنٹوں میں ڈینگی کے 353 نئے معاملہ سامنے آئے ہیں ۔ اس میں سب سے زیادہ 99 نئے معاملے صرف پٹنہ میں پائے گئے ہیں۔
پٹنہ کے علاوہ بھوجپور میں 25 مریض پائے گئے ہیں۔ پٹنہ کے علاوہ ریاست کے تمام اضلاع جیسے بھاگلپور ، سارن ، مظفر پور ، مغربی چمپارن ، مشرقی چمپارن ، مونگیر ، ویشالی ڈینگی سے متاثر ہیں۔ ریاست میں ڈینگی کے مریضوں کی کل تعداد 10857 تک پہنچ گئی ہے ۔ اس میں صرف پٹنہ میں ڈینگی کے مریضوں کی تعداد 4718 ہے ۔ اکتوبر کے مہینے میں ڈینگی کے معاملے کم ہونے کے بجائے اب تک 4122 مریض سامنے آچکے ہیں۔
پٹنہ میں ڈینگی کے معاملات میں اضافے کے ساتھ ہی سنگین مریضوں کی تعداد میں بھی کافی اضافہ ہوا ہے۔ پٹنہ کے چار سرکاری میڈیکل کالج اسپتالوں میں کل 89 مریض زیر علاج ہیں ۔ ایمس پٹنہ میں 22 مریض ، آئی جی آئی ای ایم ایس میں 22 مریض ، پی ایم سی ایچ میں 25 مریض اوراین ایم سی ایچ میں 20 مریض داخل ہیں ۔ اگر پوری ریاست کی بات کریں تو ریاست کے 12 میڈیکل کالج اسپتالوں میں کل 277 داخل مریض زیر علاج ہیں ۔ جس میں سب سے زیادہ 89 مریض بھاگلپور میڈیکل کالج اسپتال میں داخل ہیں۔
پٹنہ میں ڈینگی کی سنگین صورتحال کو دیکھتے ہوئے پٹنہ میونسپل کارپوریشن جنگی بنیادوں پر فوگنگ اور اینٹی لاروا اسپرے کرنے کا دعویٰ کر رہی ہے۔ کارپوریشن انتظامیہ کا کہنا ہے کہ جن گھروں میں ڈینگی کے معاملے ہیں وہاں اینٹی لاروا کا اسپرے کیا جا رہا ہے۔ واضح ہوکہ ڈینگی کے حوالے سے دارالحکومت پٹنہ میں ریاستی ڈینگی کنٹرول روم قائم کیا گیا ہے جو مریضوں کی مدد کے لیے 24 گھنٹے دستیاب ہے۔
محکمہ صحت کی جانب سے ڈینگی کنٹرول روم کا ہیلپ لائن نمبر 0612-2951964 جاری کر دیا گیا ہے۔ یہاں ایک کال پر لوگ اسپتالوں میں دستیاب بیڈاور بلڈ بینکوں میں پلیٹ لیٹس کی دستیابی کے بارے میں معلومات حاصل کر سکتے ہیں۔ ڈینگی کے بڑھتے معاملے پر پٹنہ کے سینئر ڈاکٹر دیواکر تیجسو کا کہنا ہے کہ موسم سرما کے آغاز کے ساتھ ہی ڈینگی کے معاملے میں کمی کا امکان ہے، لوگوں کو خاص احتیاط کرنے کی ضرورت ہے کیونکہ پٹنہ میں ڈینگی بہت پھیل چکا ہے۔
ہندوستھان سماچار/ افضل
/عطاءاللہ
