۔ (اپ ڈیٹ) ایم پی: چار اضلاع میں این آئی اے کا چھاپہ، دو نوجوانوں سے پوچھ گچھ کر رہی ہے ایجنسی
بھوپال ۔ نیشنل انویسٹی گیشن ایجنسی کی ٹیم مدھیہ پردیش میں خالصتانی دہشت گردوں اور بدمعاشوں کے درمیان کنیکشن کو لیکرسرچنگ کر رہی ہے۔ ٹیم نے منگل کو بھوپال، برہان پور، کھرگون اور بڑوانی اضلاع میں چھاپے مارے۔ این آئی اے کو اطلاع ملی تھی کہ خانوگاوں، بھوپال کا ایک نوجوان خالصتانی تنظیم سے وابستہ ہے۔ اسے حراست میں لے کر پوچھ گچھ کی جا رہی ہے۔ این آئی اے نے مدھیہ پردیش کے ساتھ ساتھ پنجاب-ہریانہ اور چندی گڑھ میں 30 مقامات پر کارروائی کی ہے۔
پولیس ذرائع سے ملی اطلاع کے مطابق خانوگاوں کے نوجوان سے بھوپال کے سیف ہاوس میں پوچھ گچھ کی جارہی ہے۔ ادھر مینڈوری میں بھی ایک گھر پر چھاپے کی اطلاع ہے، لیکن ٹیم کو یہاں کچھ نہیں ملا۔ این آئی اے کی ٹیمیں کھرگون ضلع کے دو تھانوں کے علاقوں بھگوان پورہ اور گوگانواں علاقے میں پہنچ گئی ہیں۔ بھگوان پورہ کے ستی پورہ میں تلاش اور پوچھ گچھ کی جارہی ہے۔ دونوں مقامات غیر قانونی ہتھیاروں کے اڈے ہیں۔ کھرگون کے ایڈیشنل ایس پی ایم ایس باریا نے کہا کہ ٹیم نے مقامی پولیس کی مدد طلب کی ہے۔
وہیں این آئی اے کی ٹیم نے ضلع کے راج پور تھانہ علاقہ کے کھڑکی گاوں میں دیپک پاٹل نامی نوجوان سے پوچھ تاچھ کی۔ پوچھ گچھ کے بعد ٹیم ورلا تھانہ علاقہ کےامرٹی پہنچی۔ امرٹی کو غیر قانونی ہتھیاروں کا گڑھ سمجھا جاتا ہے۔ این آئی اے اسی ضلع کے سیندھوا کے رہنے والے اتل نامی نوجوان کی تلاش کر رہی ہے۔ جب اتل کی لوکیشن مہاراشٹر کے چوپڑا تھانہ علاقے میں ملی تو ٹیم وہاں بھی گئی۔ این آئی اے کی ٹیم تقریباً 3:30 بجے ورلا سے روانہ ہوگئی۔
