نئی دہلی، 16 فروری ۔
دہلی ہائی کورٹ نے نیوز کلک کے بانی پربیر پورکایستھ کے خلاف یو اے پی اے کے تحت درج ایف آئی آر کو منسوخ کرنے کی درخواست پر سماعت کرتے ہوئے دہلی پولیس کو نوٹس جاری کیا ہے۔ جسٹس سورناکانتا شرما کی بنچ نے یہ نوٹس جاری کیا۔ کیس کی اگلی سماعت جولائی میں ہوگی۔
آج سماعت کے دوران دہلی پولیس کی طرف سے پیش ہونے والے وکیل زوہیب حسین نے ہائی کورٹ کی طرف سے نوٹس جاری کرنے کی مخالفت کی۔ حسین نے کہا کہ امیت چکرورتی، کیس میں شریک ملزم اور نیوز کلک کے ایچ آر سربراہ، سرکاری گواہ بن گئے ہیں۔ زوہیب حسین کے دلائل کی سینئر وکیل دیان کرشنن نے مخالفت کی۔ پھر عدالت نے کہا کہ نوٹس جاری کرنے کے بعد آپ اپنا موقف پیش کریں۔ اس سے پہلے یہ عرضی چار مرتبہ ہائی کورٹ میں درج کی گئی تھی لیکن ہائی کورٹ نے نوٹس جاری نہیں کیا تھا۔
آپ کو بتا دیں کہ 22 دسمبر 2023 کو ہی عدالت نے یو اے پی اے کے تحت نیوز کلک کے خلاف الزامات کی جانچ کے لیے دہلی پولیس کے اسپیشل سیل کو 60 دن کا مزید وقت دیا تھا۔ دہلی پولیس نے کہا تھا کہ اس معاملے کی تحقیقات کے لیے مزید وقت درکار ہے۔ دہلی پولیس کے اسپیشل سیل نے تحقیقات کے لیے مزید 90 دن دینے کا مطالبہ کیا تھا۔
9 جنوری کو عدالت نے امیت چکرورتی کو سرکاری گواہ بننے کی اجازت دی تھی۔ پربیر پورکایستھ اور امیت چکرورتی کو دہلی پولیس نے 3 اکتوبر 2023 کو گرفتار کیا تھا۔ دونوں کو نیویارک ٹائمز میں شائع خبر کی بنیاد پر گرفتار کیا گیا۔ نیویارک ٹائمز میں یہ خبر شائع ہوئی تھی کہ نیوز کلک نے چینی پروپیگنڈے کو فروغ دینے کے لیے رقم وصول کی ہے۔
