نئی دہلی، 31 دسمبر (ہ س)۔ دہلی پولیس کی کرائم برانچ نے منشیات کے کاروبار کے خلاف بڑی کارروائی کی ہے، ایک بین ریاستی منشیات سنڈیکیٹ کا پردہ فاش کیا ہے۔ دو الگ الگ کارروائیوں میں، پولیس ٹیم نے دو مشتبہ افراد کو گرفتار کر کے 2.034 کلو گرام ہیروئن برآمد کی، جس کی بین الاقوامی مارکیٹ میں قیمت 10 کروڑ روپے سے زائد بتائی جاتی ہے۔ پولیس نے ہیروئن کی سپلائی میں استعمال ہونے والا ایک اسکوٹر اور چھ موبائل فون بھی قبضے میں لے لیے۔
کرائم برانچ کے ڈپٹی کمشنر آف پولیس ہرش اندورا نے بدھ کو کہا کہ اندرا پوری کا رہنے والا انشول رانا دہلی-این سی آر میں بڑی مقدار میں ہیروئن سپلائی کر رہا تھا۔ ایک خفیہ اطلاع کی بنیاد پر، کرائم برانچ کی ٹیم نے دوارکا سیکٹر-08 میں کوئنز ویلی اسکول کے قریب چھاپہ مار کر اسے گرفتار کر لیا۔ تلاشی کے دوران اس کے بیگ سے 2.034 کلو گرام ہیروئن برآمد ہوئی۔ این ڈی پی ایس ایکٹ کے تحت مقدمہ درج کرکے تفتیش شروع کردی گئی۔ تحقیقات کے دوران یہ بات سامنے آئی کہ ماڑی پور کا رہنے والا گنگا پرساد عرف وکی یہ ہیروئن انشول رانا کو سپلائی کر رہا تھا جو اسے بریلی سے منگوایا کرتا تھا۔ تکنیکی نگرانی کے ذریعے، پولیس نے گنگا پرساد کے لکشمی نگر کے مقام کا پتہ لگایا اور چھاپہ مار کر اسے گرفتار کر لیا۔
دوران تفتیش ملزم نے ایک منظم گینگ کے طور پر کام کرنے کا اعتراف کیا۔ گنگا پرساد بریلی سے بڑی مقدار میں ہیروئن لاتا تھا اور انشول رانا کو سپلائی کرتا تھا، جو اس کے بعد اسے دہلی-این سی آر کے مختلف علاقوں میں ریٹیل نیٹ ورک کے ذریعے سپلائی کرتا تھا۔
پولیس ریکارڈ کے مطابق گنگا پرساد عرف وکی اس سے قبل این ڈی پی ایس ایکٹ، تعزیرات ہند اور ایکسائز ایکٹ کے تحت مقدمات میں ملوث رہا ہے۔ پولیس حکام نے بتایا کہ اس معاملے کی مکمل تفتیش جاری ہے اور وہ اس نیٹ ورک میں ملوث دیگر افراد کی تلاش کر رہے ہیں۔
—————
ہندوستان سماچار / عبدالسلام صدیقی
