روم/نئی دہلی، 04 نومبر ( ہ س)۔
ہندوستان کے وزیر خارجہ ڈاکٹر ایس جے شنکر نے یہاں اٹلی کے صدر سرجیو میتریلا اور دیگر سینئر لیڈروں سے ملاقات کی۔ ڈاکٹر جے شنکر نے ان رہنماو¿ں کے ساتھ دفاع، سائبر سیکورٹی اور دہشت گردی کے خلاف لڑائی جیسے شعبوں میں دو طرفہ اسٹریٹجک شراکت داری کو مزید مضبوط کرنے کے طریقوں پر تبادلہ خیال کیا۔ جے شنکر، جو اپنے اطالوی ہم منصب انتونیو تاجانی کی دعوت پر روم پہنچے تھے، جمعہ کو پرتگال اور اٹلی کا اپنا چار روزہ دورہ مکمل کیا۔
نئی دہلی میں وزارت خارجہ نے ہفتہ کو ایک بیان میں کہا کہ روم میں ملاقات کے دوران، اطالوی صدر نے دو طرفہ تعلقات کو مضبوط بنانے اور ہندوستان-اٹلی اور ہندوستان-یورپی یونین تعلقات کو گہرا کرنے کے لئے اپنی مضبوط حمایت کا اعادہ کیا۔ اس ملاقات پر جے شنکر نے جمعہ کو ٹویٹر پر لکھا، وہ دونوں ممالک کی اسٹریٹجک شراکت داری کو آگے بڑھانے کے لیے صدر میتریلا کی رہنمائی کو اہمیت دیتے ہیں۔ ہندوستان-اٹلی کے تعلقات ایک غیر مستحکم اور غیر یقینی دنیا میں استحکام کا ایک عنصر ہیں۔
اطالوی وزیر دفاع گیڈو کروسیٹو کے ساتھ اپنی ملاقات کے دوران، وزیر خارجہ جے شنکر نے سفارتی تعاون کو مضبوط بنانے بشمول دفاعی مینوفیکچرنگ اور دہشت گردی کے خلاف جنگ، سائبر سیکورٹی اور سمندری شعبوں میں صنعتی تعاون پر تبادلہ خیال کیا۔ بیان کے مطابق جے شنکر کے دورہ اٹلی نے دونوں ممالک کے درمیان دیرینہ تاریخی تعلقات کو مزید مضبوط کیا ہے۔ انہوں نے اٹلی کے انٹرپرائز منسٹر اڈولفو ارسو سے بھی ملاقات کی۔ ان کے ساتھ زرعی ٹیکنالوجی، انجینئرنگ، ڈیجیٹل انفراسٹرکچر، جدت اور خلائی شعبے پر زور دینے کے ساتھ دو طرفہ تجارت اور سرمایہ کاری کو بڑھانے کے طریقوں پر تبادلہ خیال کیا۔
ہندوستھان سماچار
