وزیر اعظم مودی نے کہا- یوم جمہوریہ کی تقریب میں ہندوستان-فرانس جمہوری اقدار کا جشن منائیں گے
نئی دہلی، 23 دسمبر (ہ س)۔ فرانس کے صدر ایمانوئل میکرون اس سال 26 جنوری کو ہندوستان کے یوم جمہوریہ کی تقریب میں مہمان خصوصی ہوں گے۔ وہ وزیر اعظم نریندر مودی کی دعوت پر 75ویں یوم جمہوریہ کی تقریب میں شرکت کریں گے۔ وزیر اعظم مودی نے کہا ہے کہ اس عظیم موقع پر ہندوستان-فرانس جمہوری اقدار کا جشن منائیں گے۔
وزیر اعظم نریندر مودی نے تقریباً نو گھنٹے پہلے اپنے ایکس ہینڈل پر ان منتظر لمحات کے لیے اپنی بے تابی اور خوشی شیئر کی ہے۔ انہوں نے لکھا ہے- ’’میں اپنے دوست فرانسیسی صدر ایمانوئل میکرون کا 75 ویں یوم جمہوریہ پر بطور مہمان خصوصی استقبال کرنے کا منتظر ہوں۔ اس دن ہندوستان-فرانس اسٹریٹجک شراکت داری اور جمہوری اقدار میں مشترکہ اعتماد کا جشن بھی منائیں گے‘‘۔
اس سے چند گھنٹے قبل فرانس کے صدر میکرون نے ایکس ہینڈل پر وزیر اعظم نریندر مودی کو دعوت دینے کے لیے شکریہ ادا کیا تھا۔ انہوں نے لکھا- ’’دوست نریندر مودی، دعوت کے لیے شکریہ۔ میں ہندوستان کے یوم جمہوریہ کی تقریب میں آپ کے ساتھ رہوں گا۔‘‘
ہندوستان کی وزارت خارجہ کے مطابق اسٹریٹجک پارٹنرز کے طور پر ہندوستان اور فرانس بہت سے علاقائی اور عالمی مسائل پر اعلیٰ سطح پر مماثلت رکھتے ہیں۔ اس سال ہندوستان-فرانس اپنی اسٹریٹجک شراکت داری کی 25ویں سالگرہ (سلور جوبلی) منا رہے ہیں۔ قابل ذکر ہے کہ وزیر اعظم مودی 14 جولائی کو پیرس میں منعقدہ بیسٹل ڈے پریڈ میں مہمان خصوصی تھے۔ فرانسیسی صدر میکرون نے 8 اور 9 ستمبر کو جی-20 سربراہی اجلاس کے لیے ہندوستان کا دورہ کیا تھا۔
خاص بات یہ ہے کہ ہندوستان ہر سال اپنے یوم جمہوریہ کی تقریب میں شرکت کے لیے عالمی رہنماوں کو مدعو کرتا ہے۔ کووڈ- 19 وبائی امراض کے پیش نظر 2021 اور 2022 میں کسی کو بھی تقریب میں مہمان خصوصی کے طور پر مدعو نہیں کیا گیا تھا۔ صدر میکرون یوم جمہوریہ کی تقریب میں شرکت کرنے والے چھٹے فرانسیسی رہنما ہوں گے۔ مصری صدر عبدالفتاح السیسی سال 2023 کے یوم جمہوریہ کی تقریب کے مہمان خصوصی تھے۔ سال 2020 میں اس وقت کے برازیل کے صدر جائر بولسونارو نے بطور مہمان خصوصی شرکت کی تھی۔
ہندوستھان سماچار
/شہزاد
