نئی دہلی ،یکم نومبر (ہ س)۔
ہندوستانی ریلوے نے شمال مشرقی ریاستوں کے اچھوتے مقامات پر سیاحت کو فروغ دینے کے لیے انڈین ریلوے کیٹرنگ اینڈ ٹورازم کارپوریشن (آئی آر سی ٹی سی) کے ساتھ شراکت میں ‘نارتھ ایسٹ ڈسکوری’ ٹور کا آغاز کیا ہے۔ بھارت گورو ڈیلکس اے سی ٹورسٹ ٹرین ٹور کے تحت، ٹرین 16 نومبر کو دہلی کے صفدرجنگ ریلوے اسٹیشن سے اپنا سفر شروع کرے گی۔ریلوے کی وزارت کے مطابق، 15 دنوں کے دوران ، ٹرین شمال مشرق کے مختلف مقامات بشمول آسام میں گوہاٹی ، سیواساگر ، جورہاٹ اور کازیرنگا ، تریپورہ میں اناکوٹ ، اگرتلہ اور ادے پور ، ناگالینڈ کے کوہیما اور دیما پور اور شیلانگ اور چیرا پونجی شہروں کا احاطہ کرے گی۔
میگھالیہ میں14 راتوں اور 15 دنوں کے اس دورے کے لیے چلنے والی اس ٹرین کا پہلا اسٹاپ گوہاٹی ہے ، جہاں سیاح کامکھیا مندر جائیں گے، اس کے بعد اومانند مندر اور برہم پترا ندی میں غروب آفتاب کا سفر کریں گے۔ اس کے بعد ٹرین رات کے سفر پر نہرلاگن ریلوے اسٹیشن کے لیے روانہ ہوگی ، جو اروناچل پردیش کے دارالحکومت ایٹا نگر سے تقریباً 30 کلومیٹر دور ہے۔ اس کے علاوہ سیاحوں کو جورہاٹ میں چائے کے باغات اور کازیرنگا میں رات کے قیام کے ساتھ ساتھ کازیرنگا نیشنل پارک میں صبح کی جنگل سفاری کا تجربہ بھی دیا جائے گا۔ اس کے بعد ٹرین ریاست تریپورہ کے لیے روانہ ہو گی ، جہاں مہمانوں کو گھنی جمپوئی پہاڑیوں میں واقع ایک مشہور ورثہ سائٹ اناکوٹی کے سیاحتی مقام کے دورے پر لے جایا جائے گا۔ اس کے بعد وہ دارالحکومت اگرتلہ جائیں گے ، جہاں یہ دورہ انہیں مشہور اجینتا محل ، نیرمہل اور ادے پور میں تریپورہ سندری مندر لے جائے گا۔
تریپورہ کے بعد یہ ٹرین ریاست ناگالینڈ کا احاطہ کرنے کے لیے دیما پور کے لیے روانہ ہوگی۔ مہمان صبح کے اوائل میں اپنی نشستوں سے بدر پور اسٹیشن سے لمڈنگ جنکشن کے درمیان قدرتی خوبصورتی سے بھرے ٹرین کے اس خوبصورت سفر سے لطف اندوز ہوسکتے ہیں۔ دیما پور اسٹیشن سے، سیاحوں کو بسوں کے ذریعے کوہیما لے جایا جائے گا ، جہاں وہ ناگا طرز زندگی اور دیگر مقامی مقامات کا تجربہ کرنے کے لیے کھونوما گاو¿ں جائیں گے۔ اس ٹورسٹ ٹرین کا اگلا اسٹاپ گوہاٹی ہوگا ، جہاں سے سیاحوں کو سڑک کے ذریعے میگھالیہ کی راجدھانی شیلانگ لے جایا جائے گا اور راستے میں شاندار امیم جھیل پر اسٹاپ اوور ہوگا۔ اگلے دن کا آغاز مشرقی خاصی پہاڑیوں میں واقع چیراپنجی کے سفر سے ہوگا۔ جہاں سیاح سیاحتی مقامات جیسے شیلانگ چوٹی ، ہاتھی آبشار ، نواخالکائی آبشار اور موسمائی غاروں کا دورہ کریں گے۔ چیراپنجی کے سیاح واپسی کے سفر پر دہلی واپس جانے کے لیے گوہاٹی اسٹیشن پر ٹرین میں سوار ہوں گے۔ اس سفر کے دوران یہ ٹرین تقریباً 5800 کلومیٹر کا فاصلہ طے کرے گی۔
ہندوستھان سماچارمحمدخان
