دہلی-این سی آر کی ہوا میں پھر گھلا زہر، کچھ دنوں بعد کوہرا بھی کرے گا پریشان
نئی دہلی، 14 نومبر (ہ س)۔ قومی راجدھانی دہلی-این سی آر میں دیوالی کے بعد ہوا کا معیار پھر سے خراب ہو گیا ہے اور لوگوں کو سانس لینے میں دقت ہونے لگی ہے۔ این سی آر کے بڑے شہروں میں ہوا کا معیار سنگین زمرے میں ہے۔ مرکزی آلودگی کنٹرول بورڈ کے مطابق دہلی-این سی آر میں ہوا کے معیار کا مجموعی انڈیکس (اے کیو آئی) کی سطح آج (منگل) صبح 450 پر آ گیا۔ دارالحکومت کے آر کے پورم میں اے کیو آئی 417، پنجابی باغ میں 410، آئی ٹی او میں 430 اور جہانگیر پوری میں 428 تھا۔ دریں اثنا ہندوستان کے محکمہ موسمیات نے کہا ہے کہ آلودگی کے ساتھ ساتھ دہلی-این سی آر میں آئندہ چند دنوں میں کوہرا بھی چھانے لگے گا۔
بڑھتے ہوئے بحران کے درمیان دہلی آلودگی کنٹرول کمیٹی نے دیوالی کے موقع پر دہلی میں 31 مقامات پر صوتی آلودگی کا جائزہ لیا۔ ان میں سات سائلنس زون، آٹھ رہائشی علاقے، 11 کمرشیل اور پانچ صنعتی علاقے شامل ہیں۔ اس دوران سب سے نچلی سطح نجف گڑھ اور سب سے زیادہ قرول باغ میں ریکارڈ کی گئی۔ نجف گڑھ میں سب سے کم صوتی آلودگی 53.7 ڈیسیبل اور قرول باغ میں سب سے زیادہ 84.5 تھی۔
ہندوستھان سماچار
/شہزاد
