کولکاتا، 29 نومبر (ہ س)۔ مرکزی وزیر داخلہ اور بھارتیہ جنتا پارٹی (بی جے پی) کے سینئر لیڈر امت شاہ کی بدھ کو کولکاتا میںریلی کے پیش نظر پولیس نے تمام احتیاطی تدابیر اختیار کی ہیں۔ بدھ کی صبح ایک سینئر اہلکار نے بتایا کہ ایک ہزار سے زیادہ پولیس اہلکار بشمول ڈپٹی کمشنر اور اسسٹنٹ کمشنر کے عہدے کے سینئر افسران ایسپلانیڈ کے علاقے میں تعینات رہیں گے ، جہاں شاہ ریلی سے خطاب کرنے والے ہیں۔
پولیس افسر نے کہا، ”ہم نے اس بات کو یقینی بنانے کے لیے وسیع پیمانے پر اقدامات کیے ہیں کہ شاہ کی ریلی پرامن طریقے سے منعقد کی جائے۔ سینئر پولیس افسران سیکورٹی انتظامات کی نگرانی کریں گے۔“ انہوں نے بتایا کہ سیکورٹی انتظامات کے حوالے سے جلسہ گاہ کو چھ زونز میں تقسیم کیا گیا ہے جو چھ ڈپٹی کمشنرز کی نگرانی میں ہوں گے۔ اسسٹنٹ کمشنر اور دیگر پولیس اہلکار ڈپٹی کمشنر کی معاونت کریں گے۔ شہر میں ٹریفک کو رواں دواں رکھنے کے لیے وسیع انتظامات کیے گئے ہیں تاہم ریلی کے پیش نظر آر آر ایونیو، ڈورینا کراسنگ، بینٹک اسٹریٹ اور واٹر لو اسٹریٹ پر ٹریفک چند گھنٹوں کے لیے بند رہے گی۔ انہوں نے کہا،”ہم نے لوگوں کو صبح 11:30 بجے سے شام 4:30 بجے کے درمیان شہر کے وسطی حصے میں سڑکوں پر چلنے سے گریز کرنے کی صلاح دی ہے ۔“
ریاستی انتظامیہ نے ابتدا میں اس مقام پر بی جے پی کی ریلی کی مخالفت کی تھی جہاں حکمراں ترنمول کانگریس ہر سال 21 جولائی کو یوم شہدا ریلی نکالتی ہے۔ تاہم، بعد میں کلکتہ ہائی کورٹ کے سنگل بنچ اور ڈویژن بنچ نے بی جے پی کو تقریب منعقد کرنے کی اجازت دے دی۔
ہندوستھان سماچار
