پٹنہ، 26 جولائی (ہ س)۔ بہار کے مشرقی چمپارن ضلع کے سپرنٹنڈنٹ آف پولیس (ایس پی) کی ہدایت پر چکیا کے ڈپٹی سپرنٹنڈنٹ آف پولیس (ڈی ایس پی) کی قیادت میں تشکیل دی گئی ایک ٹیم نے شمالی بہار کے بدنام زمانہ مجرم مکیش پاٹھک کو اس کے دو ساتھیوں کے ساتھ گرفتار کیا ہے۔ مکیش پر زمین پر زبردستی قبضہ کرنے اور تاوان طلب کرنے کا الزام ہے۔موتیہاری کے پولیس سپرنٹنڈنٹ سورن پربھات نے ہفتہ کے روز بتایا کہ رنجیت کمار والد آنجہانی دیناناتھ پرساد مہتو، گاؤں نیامت گنج، تھانہ مہسی، ضلع مشرقی چمپارن کی تحریری درخواست کی بنیاد پر یہ کارروائی کی گئی ہے۔ رنجیت کمار کی شکایت میں الزام لگایا گیا ہے کہ بدنام زمانہ مجرم مکیش پاٹھک اور اس کے ساتھی بولیرو کار کے ساتھ ساتھ چار پانچ موٹر سائیکلوں پر آئے اور کھیساری چوک واقع سنٹرل بینک کے سامنے سے ان کے بھائی ارجن پرساد اور بھتیجے ابھیشیک کمار کو اٹھا کر لے گئے۔ انہوں نے ان دونوں کی پٹائی بھی کی۔ اس کے بعد مقدمہ نمبر 212/25 سیکشن 127(2)/127(7)/308(3)/308(4)/351(2)/111(2)/3(5) بی این ایس کے تحت مہسی تھانہ میں درج کیا گیا۔ایس پی نے بتایا کہ مذکورہ معاملے کے حوالے سے پولیس ٹیم تشکیل دی گئی تھی۔ ٹیم نے رات کو چھاپہ مار ی کر مکیش پاٹھک (45) والد آنجہانی للن پاٹھک، اویناش گری (29) ولد رتنیش گری اور دھیرج کمار یادو (28) ولد نول رائے کو گرفتار کرلیا۔ تمام مشرقی چمپارن ضلع کے رہنے والے ہیں۔ پولیس نے واردات میں استعمال ہونے والی بولیرو گاڑی بھی برآمد کر لی ہے۔پولیس کے مطابق مکیش پاٹھک کے خلاف مشرقی چمپارن، دربھنگہ، سیتامڑھی، شیوہر اور گوپال گنج سمیت کئی اضلاع کے تھانوں میں قتل، اسلحہ ایکٹ، جیل سے فرار اور سرکاری کام میں رکاوٹ جیسے سنگین جرائم کے مقدمات درج ہیں۔ 2010 میں مہسی تھانہ میں درج مقدمہ نمبر 131/10 میں قتل اور اسلحہ ایکٹ کا الزام ہے۔ اسی تھانے میں 2003 کے مقدمہ نمبر 34/03 میں قتل اور مجرمانہ سازش کی ایف آئی آر بھی درج ہے۔ کلیان پور تھانے میں 2011 کا تاوان کا مقدمہ (نمبر 107/11)، بہیری تھانہ (دربھنگہ) میں 2015 میں قتل اورتاوان (مقدمہ نمبر 270/15) اور شیوہرتھانہ میں جیل سے فرار ہونے سے متعلق مقدمہ نمبر 150/15 اس کے مجرمانہ درج ہیں۔ہندوستھان سماچار
ہندوستان سماچار / Mohammad Afzal Hassan
