رائسین میں 6 سال کی بچی سے عصمت دری کے ملزم کا شارٹ انکاونٹر، پیر میں لگی گولی
بھوپال، 28 نومبر (ہ س)۔ مدھیہ پردیش کے رائسین ضلع میں ایک 6 سال کی بچی کے ساتھ زیادتی کی گھناونی واردات نے ریاست کو دہلا دیا۔ اب اس معاملے میں معصوم کے ساتھ درندگی کرنے والے ملزم کو آخر کار پولیس نے گرفتار کر لیا ہے۔ زیادتی کرنے والے درندے سلمان کا جمعہ کی صبح شارٹ انکاونٹر ہو گیا۔ ملزم کے پیر میں گولی لگی ہے اور وہ زخمی حالت میں اسپتال میں داخل ہے۔ رائسین ایس پی آشوتوش گپتا نے اس کی تصدیق کی ہے۔
بچی سے زیادتی کے بعد سے فرار چل رہے 30 ہزار کے انعامی بدمعاش سلمان کو بھوپال کے گاندھی نگر علاقے میں وارڈ نمبر 11 کے پاس ایک چائے کی دکان سے جمعرات کی دیر رات کو گرفتار کیا گیا۔ لوگوں نے ملزم کو پہچان لیا اور فوراً گاندھی نگر پولیس کو اطلاع دی۔ اطلاع ملتے ہی بھوپال پولیس کی ٹیم نے موقع پر پہنچ کر سلمان کو پکڑ لیا۔ اس کے بعد اسے رائسین پولیس کے حوالے کر دیا گیا۔
جمعہ کی صبح گوہرگنج اور بھوپال پولیس کی اسپیشل جوائنٹ ٹیم اسے لے کر رائسین کے لیے روانہ ہوئی۔ بھوپال سے گوہرگنج جاتے وقت بھوجپور کے مشہور شیو مندر کے پاس کیرت نگر کے جنگلی علاقے میں پولیس کی گاڑی اچانک پنچر ہو گئی۔ جیسے ہی گاڑی رکی، پولیس کے جوان نیچے اتر کر ٹائر دیکھنے لگے۔ تبھی ہتھکڑی لگے ملزم سلمان نے اچانک سب انسپکٹر کی سروس ریوالور چھیننے کی کوشش کی۔ اس نے ریوالور چھین لی اور پولیس والوں پر فائر کرنے لگا۔ بچاو میں پولیس پارٹی نے جوابی فائرنگ کی۔ ایک گولی سلمان کے داہنے پیر میں لگی۔
واقعہ صبح تقریباً 6.30 بجے کا بتایا جا رہا ہے۔ گولی لگتے ہی سلمان زمین پر گر پڑا۔ اسے فوراً ایمبولینس سے اسپتال لے جایا گیا، جہاں اس کا علاج چل رہا ہے۔ ڈاکٹروں کے مطابق اس کی حالت خطرے سے باہر ہے۔ پوچھ گچھ میں ملزم نے پولیس کو بتایا کہ جنگلوں کے راستے بھوپال میں داخل ہوا تھا۔ پیدل ہی گاندھی نگر علاقے میں آیا۔ سلمان کے پکڑے جانے کی اطلاع ملتے ہی جے ماں بھوانی ہندو تنظیم کے کارکن تھانے پہنچ گئے تھے۔ لیکن، اس سے پہلے ہی اسے گوہرگنج پولیس کو سونپا جا چکا تھا۔ بتا دیں کہ ملزم کی گرفتاری کو لے کر لوگ مظاہرہ کر رہے تھے۔ وہ ملزم کو پھانسی کی سزا دینے یا انکاونٹر کی مانگ کر رہے تھے۔
ایس پی آشوتوش گپتا نے کہا، ”ملزم پولیس پر حملہ کرنا چاہتا تھا اور بھاگنے کی کوشش کر رہا تھا۔ جوانوں نے اپنی اور ساتھیوں کی جان بچانے کے لیے ضابطے کے مطابق گولی چلائی۔ پورے واقعے کی مجسٹریل جانچ کرائی جائے گی۔“ واقعے کی اطلاع ملتے ہی بھوجپور مندر کے پاس لوگوں کی بھیڑ جمع ہو گئی۔ فی الحال سلمان پولیس کسٹڈی میں ہے۔ اس کی سیکورٹی بڑھا دی گئی ہے۔ کورٹ میں پیشی کے بعد آگے کی قانونی کارروائی کی جائے گی۔ بتا دیں کہ پولیس نے واقعے کے 6 دن بعد ملزم کو بھوپال سے پکڑا ہے۔ ادھر معصوم بچی ابھی بھی بھوپال کے اسپتال میں داخل ہے اور اس کی حالت تشویشناک ہے۔
ہندوستھان سماچار
—————
ہندوستان سماچار / انظر حسن
