نئی دہلی، 27 نومبر (ہ س)۔
مشرقی دہلی کا میور وہار علاقہ اتوار کی آدھی رات کو گولیوں کی آواز سے گونج اٹھا۔ اطلاع ملنے کے بعد دہلی پولیس کے اسپیشل سیل نے گینگسٹر سے خالصتانی دہشت گرد بنے ارشدیپ سنگھ عرف ڈلہ کے دو شوٹروں کو گھیر لیا۔ خود کو پھنسا دیکھ کر دونوں حملہ آوروں نے پولیس پر فائرنگ کردی۔
جوابی کارروائی میں پولیس نے بھی دہشت گردوں پر چھ راؤنڈ فائر کئے۔ پولیس کی فائرنگ سے ایک شوٹر پیر میں گولی لگنے سے زخمی ہوگیا۔ پولیس نے فوری طور پر دونوں کو قابو کر لیا۔ بعد میں زخمی شوٹر کو ایل بی ایس اسپتال میں داخل کرایا گیا۔ جہاں علاج کے بعد اسے ڈسچارج کر دیا گیا۔ پولیس نے دونوں کو گرفتار کرلیا۔
گرفتاردہشت گردوں کی شناخت راج پریت سنگھ عرف راجہ عرف بم (25) اور وریندر سنگھ عرف ومی (22) کے طور پر ہوئی ہے، جو گاؤں گل، فیروز پور، پنجاب کے رہنے والے ہیں۔ وریندر کو گولی لگی ہے۔ پولیس نے ان سے ایک پستول، ریوالور، 13 کارتوس، ایک دستی بم اور ایک موٹر سائیکل برآمد کر لی ہے۔ دونوں سے پوچھ گچھ جاری ہے۔
ملزم سے پوچھ گچھ کے بعد ٹیم نے دیر رات گوتم بدھ نگر کے گاؤں ڈیری سکینر میں چھاپہ مارا۔ تفتیش کے بعد پولیس نے وہاں سے سچن بھاٹی نامی نوجوان کو بھاری مقدار میں اسلحہ رکھنے کے شبہ میں حراست میں لے لیا۔ فی الحال سچن سے پوچھ گچھ جاری ہے۔ پولیس ملزمان کو آمنے سامنے بٹھا کر پوچھ گچھ کر رہی ہے۔
گرفتار کئے گئے دونوں شوٹروں نے تفتیش کے دوران انکشاف کیا ہے کہ وہ مشہور پنجابی گلوکار ایلی منگت کو ارشدیپ سنگھ عرف ڈلہ کے حکم پر قتل کرنے جا رہے تھے۔ ان دونوں نے اکتوبر میں اس کے لئے کوشش کی تھی لیکن خوش قسمتی سے ایلی منگت اپنے گھر پر موجود نہیں تھے۔ دونوں ماضی میں بھی متعدد وارداتوں میں ملوث رہے ہیں۔
ہندوستھان سماچار
/عطاءاللہ
