شیئر بازار میں تیزی کا رجحان،سینسیکس اور نفٹی میں اضافہ
نئی دہلی، 3 نومبر ۔ مضبوط عالمی اشاروں کے درمیان، گھریلو شیئر بازارمیں بھی آج تیزی کے ساتھ کاروبار ہوتا نظر آرہا ہے۔ آج کے کاروبار کی شروعات مضبوطی کے ساتھ ہوئی تھی۔ حالانکہ درمیان میں کچھ وقت کے لیے منافع وصولی کی وجہ سے فروخت کا دباو بھی بنا، لیکن خریداروں نے تھوڑی ہی دیر بعد دوبارہ تیزی سے خریداری شروع کر دی۔ پہلے 60 منٹ کا کاروبار ہونے کے بعد سینسیکس 0.64 فیصد اور نفٹی 0.65 فیصد کے اضافے کے ساتھ کاروبار کر رہے تھے۔
کاروبار کے پہلے ایک گھنٹے کے بعد حصص بازار کے بڑے شیئروں میں اپولو ہاسپٹل، ٹاٹا موٹرز، اڈانی پورٹس، اڈانی انٹرپرائزز اور یو پی ایل کے شیئر 4.36 فیصد سے لیکر 1.77 فیصد کے اضافے کے ساتھ کاروبار کر رہے تھے۔ دوسری طرف ایس بی آئی لائف انشورنس، این ٹی پی سی، ڈاکٹر ریڈی لیبارٹریز، کوٹک مہندرا اور نیسلے کے شیئر 0.62 فیصد سے لیکر 0.04 فیصد کی گراوٹ کے ساتھ تجارت کرتے ہوئے نظر آرہے تھے۔
ابھی تک کے کاروبار میں شیئر بازار میں 1992 شیئروں میں ایکٹیو ٹریڈنگ ہورہی تھی۔ ان میں سے 1557 شیئرس منافع کماکر سبز نشان میں کاروبار کر رہے تھے جبکہ 435 شیئر خسارے کے بعد سرخ نشان میں کاروبار کر رہے تھے۔ اسی طرح سینسیکس میں شامل 30 شیئروں میں سے 27 حصص خریداری کی حمایت کے ساتھ سبز نشان میں بنے ہوئے تھے۔ دوسری جانب فروخت کے دباو کے باعث 3 شیئر سرخ نشان میں کاروبار کر رہے تھے۔ جبکہ نفٹی میں شامل شیئروں میں سے 45 شیئر سبز نشان میں اور 5 شیئر سرخ نشان میں تجارت کرتے ہوئے نظر آرہے تھے۔
بی ایس ای کا سینسیکس آج 364 پوائنٹس کی چھلانگ کے ساتھ 64,444.90 کی سطح پر کھلا۔ ابتدائی کاروبار میں معمولی اتار چڑھاو کے بعد 10 بجے سے تھوڑا پہلے منافع وصولی کی وجہ سے فروخت شروع ہوگئی جس کی وجہ سے انڈیکس 64,384.36 پوائنٹس تک گر گیا۔ لیکن اس کے بعد خریداروں نے دوبارہ زوردار خریداری شروع کر دی جس کی وجہ سے یہ انڈیکس 64,521.22 پوائنٹس کی سطح پر آگیا۔ بازار میں مسلسل خرید و فروخت کے درمیان کاروبار کے پہلے گھنٹے کے بعد صبح سوا دس بجے سینسیکس 407.13 پوائنٹس کی مضبوطی کے ساتھ 64,488.03 پوائنٹس کی سطح پر کاروبار کر رہا تھا۔
سینسیکس کی طرح، این ایس ای کے نفٹی نے بھی آج 107.75 پوائنٹس کے اضافے کے ساتھ 19,241 پوائنٹس پر تجارت شروع کی۔ بازار کھلنے کے بعد خریداروں اور بیچنے والوں کے درمیان کچھ دیر تک رسہ کشی ہوتی رہی۔ لیکن کاروبار کے پہلے آدھے گھنٹے کے بعد بازار کو فروخت کا جھٹکا لگا جس کی وجہ سے انڈیکس گر کر 19,230.65 پوائنٹس کی سطح تک پہنچ گیا۔ حالانکہ کچھ دیر بعد خریداروں نے مورچہ سنبھال لیا جس کی وجہ سے اس انڈیکس کی رفتار دوبارہ بڑھ گئی۔ کاروبار کے پہلے گھنٹے تک بازار میں مسلسل خرید و فروخت کے بعد صبح سوا دس بجے نفٹی 124.90 پوائنٹس کی مضبوطی کے ساتھ 19,258.15 پوائنٹس پر کاروبار کر رہا تھا۔
