گھریلو شیئر بازار میں شروعاتی تیزی کے بعد بڑھا دباو، سینسیکس اورنفٹی نے بنایا اوپننگ کا نیا ریکارڈ
نئی دہلی، 12 دسمبر (ہ س)۔ گھریلو شیئر بازار میں آج شروعاتی تیزی کے بعد دباو کا رجحان بنا ہوا نظر آرہا ہے۔ آج کے کاروبار کی شروعات آل ٹائم ہائی اوپننگ کے نئے ریکارڈ کے ساتھ ہوئی۔ پہلی بار سینسیکس نے 70 ہزار پوائنٹس سے اوپر اور نفٹی نے 21 ہزار پوائنٹس سے اوپر تجارت شروع کی۔ حالانکہ شروعاتی کاروبار میں ہی منافع وصولی کے دباو کی وجہ سے ان دونوں انڈیکس کی رفتار میں مسلسل اتار چڑھاو آ رہا ہے۔ کاروبار کے پہلے گھنٹے کے بعد سینسیکس 0.03 فیصد کی گراوٹ کے ساتھ اور نفٹی 0.01 فیصد کی مضبوطی کے ساتھ کاروبار کر رہے تھے۔
شروعاتی ایک گھنٹے کا کاروبار ہونے کے بعد حصص بازار کے بڑے شیئروں میں سے ڈاکٹر ریڈیز لیبارٹریز، ایچ ڈی ایف سی لائف، بجاج آٹو، ہیرو موٹو کارپ اور ٹی سی ایس کے شیئرس 2.38 فیصد سے لیکر 1.38 فیصد کی مضبوطی کے ساتھ کاروبار کر رہے تھے۔ دوسری طرف بی پی سی ایل، لارسن اینڈ ٹوبرو، آئشر موٹرز، بھارتی ایرٹیل اور کول انڈیا کے شیئروں میں 3.39 فیصد سے لیکر 0.68 فیصد کی گراوٹ کے ساتھ کاروبار کرتے ہوئے نظر آرہے تھے۔
ابھی تک کے کاروبار میں شیئر بازار میں 2,033 شیئروں میں ایکٹیو ٹریڈنگ ہورہی تھی۔ ان میں سے 1,350 شیئرس منافع کماکر سبز نشان میں جبکہ 683 حصص خسارے کے بعد سرخ نشان میں کاروبار کر رہے تھے۔ اسی طرح سینسیکس میں شامل 30 شیئروں میں سے 18 شیئرس خریداری کی حمایت کے ساتھ سبز نشان میں بنے ہوئے تھے۔ دوسری جانب فروخت کے دباو کے باعث 12 شیئر سرخ نشان میں کاروبار کر رہے تھے۔ جبکہ نفٹی میں شامل شیئروں میں سے 33 شیئر سبز نشان میں تجارت کرتے ہوئے اور 17 حصص سرخ نشان میں تجارت کرتے ہوئے نظر آرہے تھے۔
بی ایس ای کا سینسیکس آج اوپننگ کا نیا ریکارڈ بناتے ہوئے 92.15 پوائنٹس کی چھلانگ کے ساتھ 70,020.68 پوائنٹس پر کھلا۔ کاروبار شروع ہوتے ہی خریدار اور فروخت کنندگان نے بازار میں ایک دوسرے پر غلبہ حاصل کرنے کی کوشش شروع کردی جس کی وجہ سے اس انڈیکس کی حرکت میں مسلسل اتار چڑھاو دیکھا گیا۔ خریداری کے تعاون سے یہ انڈیکس 70,033.64 پوائنٹس تک پہنچ گیا جبکہ فروخت کے دباو کے باعث گرکر یہ 69,889.24 پوائنٹس کی سطح پر پہنچ گیا۔ بازار میں مسلسل خرید و فروخت کے درمیان کاروبار کے پہلے گھنٹے کے بعد صبح 10:15 بجے سینسیکس 19.63 پوائنٹس کی کمزوری کے ساتھ 69,908.90 پوائنٹس کی سطح پر کاروبار کر رہا تھا۔
سینسیکس کی طرح این ایس ای کے نفٹی نے بھی آج آل ٹائم اوپننگ کا ریکارڈ بناتے ہوئے 21.45 پوائنٹس کے اضافے کے ساتھ 21,018.55 پوائنٹس پر تجارت شروع کی۔ بازار کھلتے ہی خریداروں اور بیچنے والوں کے درمیان رسہ کشی کی وجہ سے اس انڈیکس کی حرکت بھی اوپر نیچے ہونے لگی۔ خریداری کی حمایت سے یہ انڈیکس چھلانگ لگا کر 21,037.90 پوائنٹس پر پہنچ گیا جب کہ فروخت کے دباو کے باعث گر کر یہ 20,997.45 پوائنٹس کی سطح پر پہنچ گیا۔ بازار میں لگاتار خرید و فروخت کے درمیان ابتدائی 1 گھنٹے کے کاروبار کے بعد صبح 10:15 بجے نفٹی 2.85 پوائنٹس کے معمولی اضافے کے ساتھ 20,999.95 پوائنٹس کی سطح پر کاروبار کر رہا تھا۔
ہندوستھان سماچار
/شہزاد
