صرافہ بازار میں تیزی جاری، چینئی میں سونا 64 ہزار روپئے سے تجاوز کر گیا
– شادیوں کے موسم میں مانگ میں اضافے کی وجہ سے سونے اور چاندی میں اضافہ
نئی دہلی، 29 نومبر (ہ س)۔ شادیوں کے موسم نے ملک کے صرافہ بازاروں میں نئی جان ڈال دی ہے۔ شادیوں کے موسم کے آغاز سے ہی سونے کی قیمت میں اضافہ کا سلسلہ جاری ہے۔ آج چینئی میں 24 کیرٹ سونے کی قیمت 64 ہزار روپئے فی 10 گرام کی سطح سے آگے بڑھ گئی۔ چینئی کی طرح، ملک کے بیشتر صرافہ بازاروں میں، 24 کیرٹ سونا آج 63,300 روپئے فی 10 گرام سے اوپر تجارت کر رہا ہے۔
24 کیرٹ سونے کی طرح زیوراتی یعنی 22 کیرٹ سونے کی قیمت میں بھی اضافہ ہوا ہے۔ ملک کی بیشترمارکیٹوں میں آج 22 کیرٹ سونا 58 ہزار روپئے فی 10 گرام کی سطح سے اوپر پہنچ گیا ہے۔ شادیوں کے موسم کی وجہ سے ملک کی مارکیٹ میں ریٹیل کاروبار میں زبردست اضافہ ہوا ہے جس کے باعث سونے کی قیمت میں مسلسل اضافہ ہورہا ہے۔ سونے کی طرح چاندی کی قیمت میں بھی ہوشربا اضافہ ہوا ہے۔ دہلی صرافہ بازار میں آج چاندی 79,200 روپئے فی کلو پر تجارت کر رہی ہے۔
دہلی میں آج 24 کیرٹ سونا 63,530 روپئے فی 10 گرام پر تجارت کر رہا ہے، جب کہ 22 کیرٹ سونے کی قیمت 58،250 روپئے فی 10 گرام ریکارڈ کی گئی۔ ممبئی میں 24 کیرٹ سونا 63,380 روپئے فی 10 گرام اور 22 کیرٹ سونا 58,100 روپئے فی 10 گرام میں فروخت ہو رہا ہے۔ اسی طرح کولکاتا میں بھی 24 کیرٹ سونا 63,380 روپئے فی 10 گرام کی سطح پر پہنچ گیا ہے اور 22 کیرٹ سونا 58,100 روپئے فی 10 گرام کی سطح پر پہنچ گیا ہے۔
ملک کی دیگر ریاستوں کی طرح کرناٹک، تلنگانہ اور اڈیشہ کے صرافہ بازاروں میں بھی سونے نے زبردست چھلانگ لگائی ہے۔ ان تینوں ریاستوں کے دارالحکومتوں، بنگلورو، حیدرآباد اور بھونیشور میں آج 24 کیرٹ سونا 63,380 روپئے فی 10 گرام کی سطح پر فروخت ہو رہا ہے اور 22 کیرٹ سونا 58,100 روپئے فی 10 گرام کی سطح پر فروخت ہو رہا ہے۔
ہندوستھان سماچار
/شہزاد
