نئی دہلی، 17 اکتوبر (ہ س )۔
14 سے 16 اکتوبر تک دارالحکومت میں منعقد ہونے والی اقوام متحدہ کے مشن میں تعاون کرنے والے ممالک (یو این ٹی سی سی) کے فوجی دستوں کے سربراہوں کی کانفرنس کے بعد، نیپالی فوج کے نائب سربراہ لیفٹیننٹ جنرل پردیپ جنگ کے سی نے جمعہ کو یہاں ہندوستانی فوج کے سربراہ جنرل اوپیندر دویدی کے ساتھ دو طرفہ ملاقات کی۔
ہندوستانی فوج کے ہیڈکوارٹر میں ہونے والی میٹنگ کے بارے میں، نیپالی فوج نے کھٹمنڈو میں ایک بیان جاری کیا جس میں کہا گیا ہے کہ ملاقات میں دونوں ممالک کی فوجوں کے درمیان گہرے تاریخی، ثقافتی اور پیشہ ورانہ تعلقات کو مزید فروغ دینے پر توجہ مرکوز کی گئی۔ ملاقات کے دوران ہندوستان اور نیپالی فوجوں کے درمیان پائیدار تعلقات کو مزید مضبوط بنانے پر زور دیا گیا۔
دونوں ممالک کے فوجی حکام نے دفاعی تعاون کو مضبوط بنانے، مشترکہ تربیتی اقدامات کو بڑھانے اور اقوام متحدہ کے امن مشن میں تعاون کو مزید مضبوطکرنے پر تبادلہ خیال کیا۔ بیان میں کہا گیا ہے کہ اقوام متحدہ کی امن فوج ایک ایسا شعبہ ہے جہاں دونوں ممالک نے اپنے تعاون کی وجہ سے عالمی احترام حاصل کیا ہے۔
جنرل دویدی اور لیفٹیننٹ جنرل کے سی نے باقاعدہ ادارہ جاتی تبادلے اور دفاعی بات چیت کو برقرار رکھنے کے اپنے عزم کا اعادہ کیا۔ انہوں نے دونوں ہمسایہ افواج کے درمیان مسلسل تعاون کے ذریعے آپریشنل ہم آہنگی اور علاقائی استحکام کو مضبوط بنانے کی اہمیت پر زور دیا۔
ہندوستھان سماچار
ہندوستان سماچار / عطاءاللہ
