ٹوکیو، 16 جنوری (ہ س)۔ دونوں طیارے ملک کے شمالی حصے میں واقع شہر ساپورو سے تقریباً 110 میل مشرق میں واقع ہوکائیڈو کے نیو چٹوز ہوائی اڈے پر مقامی وقت کے مطابق شام ساڑھے 5 بجے آپس میں ٹکرا گئے۔کورین ایئر کا طیارہ کیتھے پیسیفک کے طیارے سے ٹکرا گیا، تاہم حادثے میں کسی کے زخمی ہونے کی اطلاع نہیں ہے۔
جاپان کے قومی نشریاتی ادارے این ایچ کے نے حکام کے حوالے سے بتایا کہ ہوکائیڈو کے ہوائی اڈوں پر کئی پروازیں منسوخ کر دی گئی ہیں اور توقع ہے کہ یہ خلل کچھ دیر تک جاری رہے گا۔
ایئرپورٹ حکام کے مطابق کورین ایئر کے طیارے اور کیتھے پیسیفک طیارے کے درمیان ‘رابطہ’ ہوا تھا تاہم فی الحال یہ واضح نہیں ہے کہ طیاروں کے درمیان تصادم کتنا شدید تھا۔
فائر ڈیپارٹمنٹ کے مطابق کورین ایئر کا طیارہ کیتھے پیسیفک طیارے سے ٹکرا گیا جو حادثے کے وقت گیٹ پر کھڑا تھا اور اس میں کوئی مسافر نہیں تھا۔ کورین ایئر کے طیارے میں 276 مسافر اور عملے کے 13 ارکان سوار تھے۔ اس حادثے میں کسی کے زخمی ہونے کی کوئی اطلاع نہیں ہے۔
موسم کی رپورٹس بتاتی ہیں کہ جاپان کے شمالی حصے میں اس وقت مرئیت بہت کم ہے۔ کچھ علاقوں میں شدید برف باری کی اطلاع ملی ہے اور حادثے کے وقت نیو چٹوز ہوائی اڈے پر درجہ حرارت 24 ڈگری سے کم تھا۔
اس سے قبل 2 جنوری کو ٹوکیو انٹرنیشنل ایئرپورٹ کے رن وے پر دو طیارے ایک دوسرے سے ٹکرا گئے تھے۔ حادثہ اس وقت پیش آیا جب مسافر طیارہ جس میں 367 مسافر اور عملے کے 12 ارکان سوار تھے لینڈنگ کے دوران رن وے پر کوسٹ گارڈ کے طیارے سے ٹکرا گئے۔ حادثے کے بعد مسافر طیارہ چند گھنٹوں میں مکمل طور پر جل کر راکھ ہوگیا۔ اگرچہ اس کے تمام مسافر بغیر کسی نقصان کے بچ گئے لیکن طیارے میں سوار کوسٹ گارڈ کے پانچ اہلکار ہلاک ہو گئے۔
ہندوستھان سماچار
