بیجاپور، 16 دسمبر (ہ س)۔ چھتیس گڑھ میں نکسل ازم کے خلاف جاری مہم میں سیکورٹی فورسز نے ہفتہ کو بیجاپور میں بڑی کارروائی کرتے ہوئے ان کے کیمپ کو منہدم کردیا۔ انکاونٹر کے بعد نکسلائٹ وہاں سے فرار ہوگئے۔ جائے وقوعہ سے بھاری مقدار میں دھماکہ خیز مواد برآمد ہوا ہے۔
بیجاپور کے گنگالور تھانہ پولیس کے مطابق، اطلاع موصول ہوئی تھی کہ نکسلیوں کے کور علاقے پیداکورما کے جنگلات میں نکسلائٹ کمانڈر اور گنگالور ایریا کمیٹی کمانڈر دنیش موڑیم اور ایل او ایس کمانڈر دولا کارم، گنگالور ایریا آر پی سی کملو پونیم سمیت 15-20 دیگر مسلح نکسلائٹس کی موجودگی ہے۔ جمعہ کی رات تلاشی لینے کے بعد ہفتہ کی صبح ڈی آر جی، ایس ٹی ایف، بستر فائٹرز اور کوبرا بٹالین کے اہلکاروں کا نکسلیوں کے ساتھ انکاونٹر ہوا۔ ڈھائی گھنٹے کے انکاونٹر کے بعد نکسلائٹ وہاں سے فرار ہو گئے۔ نکسلیوں کے ساتھ انکاونٹر کے بعد ان کے کیمپ کو منہدم کر دیا گیا۔
پولیس کا کہنا ہے کہ نکسلی کیمپ سے بھاری مقدار میں دھماکہ خیز مواد، ادویات، نکسلی یونیفارم، ممنوعہ پروپیگنڈہ مواد، نکسلی لٹریچر اور دیگر روزمرہ کے استعمال کا سامان برآمد کیا گیا ہے۔ کسی جانی نقصان کی کوئی اطلاع نہیں ہے۔ جائے وقوعہ کے اطراف تلاشی جاری ہے۔
ہندوستھان سماچار
