गुवाहाटी, 25 नोभेम्बर (हि.स.)। असम विधानसभाको शीतकालीन सत्र शुरू भएको पहिलो दिन नै गायक जुबिन गर्गको रहस्यमय मृत्युको मुद्दाले सदनलाई ततायो। यस विषयमा सभा स्थगन गर्नुपर्ने प्रस्तावको मागमा मंगलवार सदनमा व्यापक खैलाबैला मचियो। विपक्षी दलहरूले सकारमाथि जवाफदेही तय गर्ने दबाव दिए अनि मामिलामाथि विस्तृत चर्चा गर्ने माग गरे।
सत्र शुरू हुनपूर्व विधायक अखिल गोगोई विशेष पोशाक र हातमा पोस्टर बोकेर विधानसभामा पुगे अनि प्रतीकात्मक विरोध दर्ता गराए। उनले जुबिनको चर्चित गीत “पलिटिक्स नकरिबा बंधु” गुनगुनाउँदै दाबी गरे, यो गीत पूर्व मुख्यमन्त्री सर्वानन्द सोनोवाल अनि वर्तमान मुख्यमन्त्री डा. हिमन्त बिस्व सरमालाई ध्यानमा राखेर लेखिएको थियो।
यसमाथि प्रतिक्रिया व्यक्त गर्दै मुख्यमन्त्री डा. हिमन्त बिस्व सरमाले भने, यो गीत वास्तवमा अखिल गोगोईलाई नै ध्यानमा राखेर लेखिएको थियो।
यसैबीच कंग्रेस विधायिका नन्दिता दासले गुवाहाटी एयरपोर्टको नयाँ टर्मिनलको नामाकरण जुबिन गर्गको नाममा गर्ने माग गरिन्। यसमा मुख्यमन्त्री सरमाले स्पष्ट पारे, एयरपोर्टको नाम पहिलाबाटै गोपीनाथ बरदलैको नाममा राखिसकिएको छ, त्यसैले यसलाई परिवर्तन गर्न सम्भव छैन।
यसअघि नेता प्रतिपक्ष देबब्रत सैकियाले सभा स्थगनको प्रस्ताव राख्दै दिनभरिको कार्यसूचीलाई रद्द गर्ने तथा जुबिन गर्गको मृत्युमाथि विशेष चर्चा गर्ने माग गरे जसपश्चात सदनमा यस मुद्दामा चर्चा शुरू गरियो। सौकियाले भने, सरकारले जुबिन गर्गलाई न्याय दिलाउन सुनिश्चित गर्नुपर्छ।
विधायक मनोरञ्जन तालुकदारले पनि बहसमा भाग लिँदै अपील गरे, जुबिन गर्गको धर्मलाई राजनीतिक रंग नदिइयोस्। उनले आरोप लगाए, सत्तासिन दलले यस मुद्दालाई धर्मको आधारमा मोड़्ने चेष्टा गरिरहेको छ।
हिन्दुस्थान समाचार / उष्णता छेत्री शर्मा
