गान्तोक, 28 सेप्टेम्बर (हि.स.)। सिक्किम सरकारको वाणिज्य तथा उद्योग विभागले वर्ल्ड फुड इन्डिया २०२५ मा आफ्नो प्रभावकारी सहभागिता सफलतापूर्वक सम्पन्न गरेको छ। राज्यको प्रतिनिधित्व गर्दै दिपेन सुब्बा (ओएसडी), हेमन्त खतीवडा र चम्पा शर्मा (संयुक्त सचिवहरू), पेमा साङ्मो भोटिया (संयुक्त निर्देशक, डीएचएच) साथै ३७ उद्यमी र विभागका ७ जना कर्मचारीहरूले २५ देखि २८ सेप्टेम्बर २०२५ सम्म नयाँ दिल्लीको भरत मण्डपममा आयोजित कार्यक्रममा सहभागिता जनाए।
यस कार्यक्रममा सिक्किमका उद्यमीहरूले आफ्ना उत्पादनहरूलाई राष्ट्रिय तथा अन्तरराष्ट्रिय बजारमा प्रस्तुत गर्ने महत्वपूर्ण अवसर प्राप्त गरे। प्रदर्शनको तेस्रो दिनमा वाणिज्य तथा उद्योग विभागकी सचिव कर्मा डी. योत्सोले सिक्किमको प्रदर्शनी स्थलको अवलोकन गरिन्। उनले उपस्थित ३७ जना उद्यमीहरूसँग व्यक्तिगत रुपमा भेटघाट गर्दै आत्मविश्वासका साथ उत्पादनहरू प्रस्तुत गर्न प्रेरणा दिइन्, तिनका व्यवसायिक आकांक्षाबारे छलफल गरिन् र मूल्यवान् मार्गदर्शन प्रदान गरिन्।
उनको उपस्थिति उद्यमीहरूको मनोबल बढाउने मात्र नभई विभागले स्थानीय उद्यमीहरूलाई अन्तरराष्ट्रिय स्तरसम्म पुर्याउने दृढ संकल्पलाई पुनः पुष्टि गरेको विभागले आज प्रेस विज्ञप्तिमा बताएको छ।
विभाग अनुसार, सिक्किम प्रतिनिधिमण्डलको सहभागिता उत्साहजनक रह्यो र धेरै सकारात्मक परिणामहरू प्राप्त भए। धेरै उद्यमीहरूले आफ्ना उत्पादनमा ठूलो चासो देखिएको तथा सम्भावित खरिदकर्ता र साझेदारहरूसँग महत्वपूर्ण सम्पर्क स्थापित भएको जानकारी दिएका छन्।
उद्यमीहरूले यस्तो अवसर प्रदान गरेकोमा राज्य सरकार र वाणिज्य तथा उद्योग विभागप्रति गहिरो आभार व्यक्त गरेका छन्। उनीहरूले यस प्रदर्शनीलाई आफ्नो बजार विस्तार, सञ्जाल निर्माण तथा राष्ट्रिय र अन्तरराष्ट्रिय खाद्य उद्योगमा सिक्किमको उपस्थिति मजबुत बनाउनको लागि महत्वपूर्ण कदम भएको बताएका छन्।
विभागले उद्यमीहरूको निरन्तर समर्थन गर्ने र ठूला बजार प्लेटफर्महरूसम्म पहुँच दिलाउने प्रतिबद्धता जनाउँदै सिक्किमको वैश्विक खाद्य क्षेत्रमा उपस्थितिलाई अझ सबल बनाउन योगदान दिने बताएको छ।
हिन्दुस्थान समाचार / बिशाल
