रत्नागिरी, 15 जानेवारी, (हिं. स.) : गेले तीन दिवस येथे चाललेल्या कोकण विभागीय महसूल क्रीडा आणि सांस्कृतिक स्पर्धेचा समारोप आज झाला. स्पर्धेत यजमान रत्नागिरीने विजेतेपद पटकावले.
विभागीय आयुक्त डॉ. महेंद्र कल्याणकर यांच्या हस्ते स्पर्धेचे पारितोषिक वितरण झाले. उपविजेतेपद मुंबई उपनगर जिल्ह्याला मिळाले. यावेळी डॉ. कल्याणकर म्हणाले, स्पर्धा सकारत्मकतेने घेतली पाहिजे. रत्नागिरीने ३६८ गुण मिळवत विजेतेपद मिळविले. हा एकोपा असाच टिकवून ठेवावा. प्रशासकीयदृष्टयादेखील कोकण विभाग पुढे आहे. महसूल विभागात अनेक चांगले खेळाडू आणि कलाकार आहेत. पुढील वर्षाच्या स्पर्धेसाठी वर्षाच्या सुरुवातीपासूनच खेळाडूंची निवड व्हावी.पुढील वर्षी सिंधुदुर्ग जिल्ह्यात या स्पर्धा भरवण्यात येणार आहेत. येत्या २० ते २२ डिसेंबर कालावधीत या स्पर्धा होतील, असे सांगून डॉ. कल्याणकर यांनी क्रीडा ध्वज सिंधुदुर्ग जिल्ह्याकडे सोपविला.जिल्हाधिकारी सिंह म्हणाले, या स्पर्धेसाठी सर्वांनी खूप मेहनत घेतली आहे. खिलाडू वृत्तीने स्पर्धा पार पडली. सांस्कृतिक कार्यक्रम चांगले झाले. टीम स्पिरीट सर्वांनीच चांगले दाखवले. प्रदर्शन सर्वांनी चांगले केले. आरोग्य चांगले ठेवा. आनंदी राहा, असा संदेशही त्यांनी दिला.
सांघिक स्पर्धेचा निकाल असा – क्रिकेट विजेता रत्नागिरी, उपविजेता मुंबई उपनगर, फुटबाल विजेता सिंधुदुर्ग उपविजेता ठाणे, व्हॉलिबॉल विजेता रत्नागिरी, उपविजेता मुंबई शहर, थ्रो बॉल विजेता रत्नागिरी, उपविजेता मुंबई उपनगर, खो-खो (पुरुष) विजेता ठाणे, उपविजेता मुंबई उपनगर, खो-खो (महिला) विजेता रत्नागिरी, उपविजेता रायगड, कबड्डी विजेता रत्नागिरी, उपविजेता रायगड, संचलन विजेता रत्नागिरी, उपविजेता रायगड.पारितोषिक वितरण समारंभाला पोलीस अधीक्षक धनंजय कुलकर्णी, मुख्य कार्यकारी अधिकारी कीर्ती किरण पुजार उपस्थित होते.
हिंदुस्थान समाचार
